01.07.2025
2025 թվականի հունիսի 26-ին Հայոց ցեղասպանության թանգարան-ինստիտուտի գիտաժողովների դահլիճում տեղի ունեցավ «Արմատ և ծիլ» ստեղծագործահետազոտական միջդպրոցական մրցույթի ամփոփման և մրցանակաբաշխության հանդիսավոր արարողությունը։
Այս տարի մրցույթին մասնակցել են 46 աշակերտ՝ Երևանի, ՀՀ տարբեր մարզերի 14 դպրոցներից, ինչպես նաև ԱՄՆ Դետրոյթ քաղաքի Ալեք և Մարի Մանուկյան հայկական դպրոցից։ Աշակերտների հետ աշխատել են 16 մենթոր ուսուցիչներ, որոնց աջակցությամբ էլ նրանք իրականացրել են ստեղծագործահետազոտական նախագծերը:
Մրցույթի հեղինակ Անի Մանուկյանը իր ելույթում ընդգծեց, որ այս տարվա մրցույթն իրականացվել է ԿԳՄՍ նախարարության, Հայոց ցեղասպանության թանգարան-ինստիտուտի, «Աջակիցներ» ՀԿ-ի, Հայ կամավորական ցանց կազմակերպության, ինչպես նաև Հանեսյան և Այնթապլյան ընտանիքների աջակցությամբ։
Նշանակալի է, որ այս տարի մրցույթին առաջին անգամ մասնակցել են նաև ազգությամբ եզդի աշակերտներ և Ամերիկայի հայկական դպրոցի ներկայացուցիչներ։ Մրցույթը ներառել է տասներկու անվանակարգ, որոնց շրջանակում հանձնվել են մրցանակներ։ Բացի այդ, Հայոց ցեղասպանության թանգարան-ինստիտուտի կողմից երկու աշակերտներ արժանացել են հատուկ մրցանակի, որը նրանց է հանձնել ՀՑԹԻ կրթական ծրագրերի պատասխանատու Ինեսա Ստեփանյանը։ Մասնակիցներից 4-ին One Way Tour տուրիստական գործակալությունը տվեց մեկօրյա ուղևորության հնարավորություն Հայաստանում: Մրցանակակիրներից մեկն էլ հրավիրվեց մասնակցելու Մարդու իրավունքների ամառային դպրոցին, որը կազմակերպել է Կիրառական գիտությունների միջազգային համալսարանը։
