02.07.2026


Հունիսի 27-ին «Հայոց ցեղասպանության թանգարան-ինստիտուտ» հիմնադրամի գիտաժողովների սրահում տեղի ունեցավ «Արմատ և ծիլ» հետազոտաստեղծագործական մրցույթի հանդիսավոր մրցանակաբաշխությունը։

Մրցույթը, որն այս տարի անցկացվում էր արդեն չորրորդ անգամ, մեկնարկել էր 2026 թվականի հունվարին։ Ծրագրի շրջանակում մասնակիցների և նրանց մենթորների համար կազմակերպվել էին առցանց դասընթացներ, ինչպես նաև հանդիպումներ ոլորտի փորձագետների հետ։ Ստացած գիտելիքներն ու խորհուրդները մասնակիցներին հնարավորություն էին տվել ուսումնասիրելու, վերարժևորելու և գրի առնելու իրենց ընտանիքների ու նախնիների պատմությունները։

Այս տարի մրցույթին մասնակցել են 11-14 տարեկան 38 պատանի՝ Երևանից և Հայաստանի Հանրապետության տարբեր մարզերից։ Մրցանակաբաշխության ընթացքում հայտարարվեցին հաղթողների անունները, ինչպես նաև ներկայացվեցին տարբեր անվանակարգերում լավագույնը ճանաչված աշխատանքների հեղինակները։

Միջոցառումն անցավ ջերմ մթնոլորտում՝ լի հետաքրքիր անակնկալներով։ Հատկանշական էր, որ երկու մասնակից արժանացան «Հայոց ցեղասպանության թանգարան-ինստիտուտ» հիմնադրամի կողմից սահմանված հատուկ մրցանակների։

Մրցանակաբաշխության գլխավոր աջակիցը «Հայոց ցեղասպանության թանգարան-ինստիտուտ» հիմնադրամն էր, որի աջակցությամբ ևս մեկ անգամ կարևորվեց երիտասարդ սերնդի ներգրավվածությունը ընտանեկան հիշողության, ինքնության և պատմական ժառանգության պահպանման ու փոխանցման գործում։