15.08.2025
Օգոստոսի 15-ին Հայոց ցեղասպանության թանգարան-ինստիտուտի գիտաժողովների դահլիճում տեղի ունեցավ գիտական միջոցառում՝ նվիրված պատմական տրավմաների ուսուցման և քաղաքացիական կրթության փոխկապակցվածությանը։
Միջոցառման շրջանակում հանդես եկան Մարբուրգի համալսարանի ներկայացուցիչներ՝ անդրադառնալով Գերմանիայում Հոլոքոստի կրթության փորձին և դրա դերին ժամանակակից քաղաքացիական գիտակցության ձևավորման գործընթացում։
Դոկտոր, պրոֆեսոր Քրիստինա Բրյունինգը (Մարբուրգի համալսարան) ներկայացրեց զեկույցը՝ «Ուսումնասիրելով Հոլոքոստի կրթության և քաղաքացիական կրթության փոխկապակցվածությունը Գերմանիայում», որտեղ անդրադարձավ Հոլոքոստի ուսուցման կրթական նպատակներին, մեթոդաբանական մոտեցումներին և դրանց ազդեցությանը ժողովրդավարական արժեքների, մարդու իրավունքների և պատասխանատու քաղաքացիական դիրքորոշման ձևավորման վրա։
Երկրորդ զեկույցով հանդես եկավ Փոլ Շեյդը (Մարբուրգի համալսարան)՝ «Սովորելով կոլեկտիվ տրավմաների՞ց. մոտեցումներ, նպատակներ և մեթոդներ դասագրքերում» թեմայով։ Զեկույցում վերլուծվեցին դպրոցական դասագրքերում կոլեկտիվ տրավմաների ներկայացման ձևերը, պատմական հիշողության փոխանցման խնդիրները և կրթական նարատիվների ձևավորման ազդեցությունը սովորողների ընկալումների վրա։
Միջոցառումն ուղեկցվեց ակտիվ քննարկմամբ, որի ընթացքում մասնակիցները կարևորեցին տարբեր երկրների փորձի համադրումը, պատմական բռնությունների ուսուցման պատասխանատվությունը և կրթության դերը անցյալի հանցագործությունների գիտակցման ու դրանց կրկնությունը կանխելու գործում։
Գիտական հանդիպումը նպաստեց միջազգային ակադեմիական համագործակցության խորացմանը և Հայոց ցեղասպանության, Հոլոքոստի ու այլ կոլեկտիվ տրավմաների ուսումնասիրման կրթության զարգացմանը։
