16.11.2025
Հայոց ցեղասպանության թանգարան-ինստիտուտը շարունակաբար ամրապնդում և ծավալում է իր դիրքերը՝ դառնալով ցեղասպանագիտության միջազգային առանցքային գիտական կենտրոն։ Մեր գիտաշխատողներն ակտիվորեն իրենց հոդվածներն են հրատարակում հեղինակավոր գիտական պարբերականներում՝ նպաստելով նոր գիտելիքի ստեղծմանը, միջազգային ակադեմիական երկխոսությանը և արդի հետազոտական ուղղությունների զարգացմանը։
Ուրախությամբ հայտնում ենք, որ ՀՑԹԻ-ի ավագ գիտաշխատող պատմագիտության դոկտոր Գևորգ Վարդանյանի նոր հետազոտությունը հրատարկվել է բարձր վարկանիշ ունեցող Memory Studies (Q1՝ Web of Science և Scopus) միջազգային գիտական պարբերականում (հղումը՝
https://journals.sagepub.com/doi/10.1177/17506980251388350:
Հոդվածում հեղինակը Հայոց ցեղասպանությունը ներկայացնում է որպես շարունակական գործընթաց, որի ազդեցությունը չի ավարտվում զանգվածային սպանություններով։ Վերլուծելով ԱՄՆ-ում հաստատված հայ համայնքային գործունեության երեք ձև՝ սգո արարողությունները, դրամահավաքները և հրապարակումները, նա ցույց է տալիս, որ անմիջական հետցեղասպանական շրջանում հիշողության այս պրակտիկաները ոչ միայն նպատակ ունեին ոգեկոչելու նահատակներին, այլև դիմադրելու ցեղասպանական քաղաքականության ավելի լայն ու խորքային նպատակներին։
Այս հետազոտությունը նշանակալի ներդրում է ցեղասպանության հիշողության և դիմադրության փոխհարաբերության ուսումնասիրության մեջ:
