19.11.2025


Նոյեմբերի 8-ին և 9-ին Գերմանիայի Պոտսդամ քաղաքում տեղի ունեցավ Յոհաննես Լեփսիուսի տուն-թանգարանի և Մյունխենի ազգության իրավունքի և ռեգիոնալիզմի միջազգային ինստիտուտի կազմակերպած «Հայոց ցեղասպանություն․ 110 տարի անց» խորագրով երկօրյա միջազգային գիտաժողով, որին մասնակցել են ՀՑԹԻ-ի աշխատակիցներ Միհրան Մինասյանը, Գոհար Խանումյանը, Ռեգինա Գալուստյանը և Աննա Կազարյանը: Գիտաժողովին մասնակցում էին պատմաբաններ, ցեղասպանագետներ, միջազգային իրավունքի մասնագետներ աշխարհի տարբեր երկրներից՝ Հայաստանից, Գերմանիայից, Ֆրանսիայից, Լեհաստանից, Լիբանանից, Թուրքիայից։

ՀՑԹԻ-ի աշխատակիցներն ներկայացրեցին հետևյալ թեմաները.

Միհրան Մինասյան, Հայ երեխաների զանգվածային սպանությունները Սիրիայում Հայոց ցեղասպանության ընթացքում,
Գոհար Խանումյան, Սողոմոն Թեհլիրյանի Բեռլինի բանտային օրագիրը,
Ռեգինա Գալուստյան, Ապամարդայնացման դինամիկա. ուսումնասիրություն Հայոց ցեղասպանության վերաբերյալ,
Աննա Կազարյան, Հայերի տեղահանությունը Քղիի գավառակում։ Բռնի տեղահանություն, կոտորած և գոյատևում:

Դեռ 2005 թ․ Հայոց ցեղասպանության թանգարան-ինստիտուտի և Լեփսիուսհաուսի միջև կնքվել է Համագործակցության պայմանագիր, որի շրջանակներում առայսօր էլ շարունակվում է փոխշահավետ համագործակցություն։

Նշենք, որ Լեփսիուսհաուսը գտնվում է հայտնի Ցեցիլիենհոֆ պալատի հարևանությամբ, որտեղ տեղի է ունեցել Պոտսդամի կոնֆերանսը։