24.05.2025
Հայոց ցեղասպանության թանգարան-ինստիտուտում տեղի ունեցավ Քլարկի համալսարանի Հոլոքոստի և ցեղասպանությունների ուսումնասիրությունների Սթրասլեր կենտրոնի` Հայոց ցեղասպանության ուսումնասիրությունների ամբիոնի վարիչ Էլիզ Սեմերջյանի «Մնացորդներ. Հայոց ցեղասպանությունը արտացոլող արխիվներ» (Remnants. Embodied Archives of the Armenian Genocide, Stanford University Press, 2023) գրքի քննարկումը: Գիրքը 2024 թ.-ին արժանացել է Մերձավոր Արևելքի կանանց ուսումնասիրությունների ասոցիացիայի (AMEWS) կողմից լավագույն գիրք մրցանակին։
Էլիզ Սեմերջյանը խոսեց Հայոց ցեղասպանության հետհիշողության (post-memory) երեք ձևերի մասին` մարմին, մաշկ և ոսկորներ: Հեղինակն անդրադարձավ հատկապես այն հայ կանանց ու երեխաներին, որոնք բռնի կերպով իսլամացվել էին, և որոնց մարմիններին դաջվել էին ցեղային պատկանելիության նշաններ։ Ըստ հեղինակի` այդ մասնատված մարմինները, դաջվածքով մաշկերը և անապատներից գտնված ոսկորները դարձել են արխիվ, որոնք փաստագրում են պատմությունը, բռնությունը, կորուստը և դիմադրությունը:
Գրքի քննարկումն ավարտվեց ակտիվ հարցուպատասխանով:
