25.11.2025
Վերջին տարիներին իրավական ուսումնասիրությունները Հայոց ցեղասպանության թանգարան-ինստիտուտի (ՀՑԹԻ) հետազոտական կարևոր ուղղություններից են:
International Criminal Law Review միջազգային ամսագրում (WOS, Scopus Q2) տպագրվել է Հայոց ցեղասպանության թանգարան-ինստիտուտի տնօրեն պ.գ.թ. Էդիտա Գզոյանի, Նանտերի համալսարանի պրոֆեսոր և ՀՑԹԻ-ի հրավիրյալ հետազոտող Թոմաս Հոխմանի ու ՀՑԹԻ-ի գիտաշխատող ի.գ.թ. Էդգար Մեյրոյանի հեղինակած “Beyond the Defective Gas Chambers: Rediscovering the Crime of Attempted Genocide” [Թերսարք գազախցիկներից անդին. ցեղասպանության փորձի հանցագործության վերաիմաստավորումը] հոդվածը (հղումը՝
https://doi.org/10.1163/15718123-bja10248):
Հոդվածով առաջին անգամ իրավական գնահատական է տրվում Սումգայիթում, Կիրովաբադում (Գանձակ) և Բաքվում 1988-1990 թթ. տեղի ունեցած հայերի դեմ ջարդերին: Հեղինակները, ջարդերը որակելով որպես ցեղասպանություն, առաջարկում են գործարկել Ցեղասպանության հանցագործության կանխարգելման և պատժի մասին կոնվենցիայի 3-րդ հոդվածի 1-ին կետը, որը քրեականացնում է ցեղասպանության փորձը:
Հոդվածը նաև կարևոր նշանակություն ունի ցեղասպանության փորձի կոնցեպտի մեկնաբանման և կիրառման ուղղությամբ:
