26.02.2026


Հայոց ցեղասպանության թանգարան-ինստիտուտում տեղի ունեցավ Կալիֆոռնիայի Դևիսի համալսարանի պրոֆեսոր, Մարդու իրավունքների ուսումնասիրությունների ծրագրի հիմնադիր տնօրեն Քիթ Դեյվիդ Ուոթենպոյի դասախոսությունը։

Բանախոսը հանդես եկավ “The Pomegranate and the Orange: A Comparative Framework for Genocide in the Middle East – The Ottoman Armenian Medz Yeghern and the Palestinian al-Nakba” [Նուռը և նարինջը․ ցեղասպանության համեմատական վերլուծության շրջանակը Մերձավոր Արևելքում․ օսմանյան հայության Մեծ եղեռնը և պաղեստինցիների ալ-Նաքբան] խորագրով դասախոսությամբ:

Դասախոսության ընթացքում պրոֆեսոր Ուոթենպոն ներկայացրեց Հայոց ցեղասպանության և պաղեստինցիների ալ-Նաքբայի համեմատական ուսումնասիրության տեսական և մեթոդաբանական շրջանակը՝ անդրադառնալով օսմանյան իշխանությունների՝ հայ բնակչության տեղահանության և ոչնչացման քաղաքականության և պաղեստինցիների բռնի տեղահանության գործընթացների միջև առկա նմանություններին: Նա վերլուծեց հիշողության, տեղահանության, կորուստի և հայրենիքի խորհրդանշական ընկալումները՝ նուռը և նարինջը ներկայացնելով որպես մշակութային հիշողության կարևոր խորհրդանիշներ։

Բանախոսը կարևորեց համեմատական ցեղասպանագիտության դերը ոչ միայն անցյալի հանցագործությունների ավելի խոր ըմբռնման, այլև ժամանակակից աշխարհում մարդու իրավունքների պաշտպանության և ցեղասպանությունների կանխարգելման մեխանիզմների զարգացման գործում։

Դասախոսությանը ներկա էին գիտական համայնքի ներկայացուցիչներ, ուսանողներ և թեմայով հետաքրքրված այլ անձինք։ Հանդիպման ավարտին տեղի ունեցավ հարցուպատասխան և ակտիվ քննարկում։

Միջոցառումը կազմակերպել էր Հայոց ցեղասպանության թանգարան-ինստիտուտը՝ նպաստելու ցեղասպանության համեմատական ուսումնասիրության զարգացմանը և միջազգային գիտական երկխոսության խորացմանը։