01.05.2025
Հայոց ցեղասպանության թանգարան-ինստիտուտում ապրիլի 27-ին տեղի ունեցավ Անի Հովհաննէսեանի «Թաքցրած քարտեզը» փաստավավերագրական ֆիլմի ցուցադրություն-քննարկումը։
Կորուսյալ հայրենիքի մասին պատմող ֆիլմը դիտելու եկած հանդիսատեսին ողջունեց ՀՑԹԻ-ի տնօրեն Էդիտա Գզոյանը։ Արժևորելով Անի Հովհաննէսեանի ստեղծած ֆիլմը՝ Գզոյանը մատնանշեց այն հանգամանքը, որ Անիի հայրը՝ աշխարհահռչակ գիտնական, պատմաբան Ռիչարդ Հովհաննէսեանը, մեծապես կապված է եղել ՀՑԹԻ-ի հետ, մասնակցել է բազմաթիվ գիտաժողովների և հանրային ելույթներ ունեցել, իսկ 2019-ին արժանացել ՀՑԹԻ-ի Հենրի Մորգենթաուի հուշամեդալին:
Անի Հովհաննէսեանի ֆիլմը հեղինակի՝ իր պապերի երկիր կատարած ուխտագնացության մասին է։ Երկար ու ձիգ տարիներ նվիրելով ֆիլմի ստեղծմանը՝ հենց օտարերկրացու միջոցով էլ Անին ներկայացնում է Հայոց ցեղասպանության, հայրենազրկության, մշակութային ժառանգության ոչնչացման մանրամասները և ընդհանրապես Թուրքիայի ցեղասպան քաղաքականության շարունակման դրսևորումները։ Ֆիլմը բազմիցս ցուցադրվել է ԱՄՆ֊ի և շատ այլ երկրների հեղինակավոր հեռուստաալիքներով, այդ թվում՝ հայաստանյան։
Հայոց ցեղասպանության թանգարան-ինստիտուտում ցուցադրված «Թաքցրած քարտեզը» ֆիլմը կարոտի անսահման ու անմար զգացում արթնացրեց՝ ներկաներին վերստին հիշեցնելով կորսված հայրենիքի և անցյալի անջնջելի հետքերի մասին։
Ֆիլմի դիտումից և քննարկումից հետո հեղինակը Հովհաննէսեանների ընտանեկան արխիվից գրքեր նվիրաբերեց ՀՑԹԻ-ի գրադարանին:
Ֆիլմի ցուցադրությամբ ամփոփվեց «Գոյատևման արձագանքներ, իրականության եռագրություն» նախագիծը։
