01.12.2023
«Հայոց ցեղասպանության թանգարան-ինստիտուտ» հիմնադրամի (ՀՑԹԻ) և Հարավային Կալիֆոռնիայի համալսարանի Շոա հիմնադրամի (University of Southern California, on behalf of its USC Shoah Foundation – The Institute for Visual History and Education (USC SF) միջև 2021 թ. հոկտեմբերին կնքված փոխգործակցության շրջանակներում Շոա հիմնադրամն իր Տեսողական պատմության արխիվից (USC SF Visual History Archive) ազատ օգտվելու իրավունք է տրամադրել ՀՑԹԻ-ին և վերջինիս ճանաչվել է որպես իր Հավաքածուների գործընկեր (Collection Partner):
Այսուհետ ՀՑԹԻ-ի աշխատակիցներն առանց սահմանափակումների կարող են օգտվել Շոա հիմնադրամի հարուստ արխիվից, որտեղ հավաքված են ինչպես Հայոց ցեղասպանությունը այնպես էլ այլ ցեղասպանություններն ու զանգվածային կոտրածները վերապրածների հազարավոր տեսաձայնագրություններ: Այս արխիվի մեջ է մտնում նաև երջանկահիշատակ Ռիչարդ Հովհաննիսյանի Հայոց ցեղասպանության բանավոր պատմությունների հավաքածուն (Հայոց ցեղասպանությունը վերապրածների ավելի քան 1000 տեսաձայնագրություններ), որը նրա առաջարկով և համաձայնությամբ, ամբողջական վերականգնումից և թվայնացումից հետո տրամադրվելու է նաև ՀՑԹԻ-ին:
Իր հերթին ՀՑԹԻ-ն Տեսողական պատմության արխիվից օգտվելու հնարավորություն է տրամադրելու այն հայաստանյան թանգարաններին, գիտական ու կրթական շրջանակներին, որոնք կցանկանան ծանոթանալ և օգտվել Շոա հիմնադրամի արխիվից: Արխիվից օգտվելու համար պետք է այցելել Հայոց ցեղասպանության թանգարան-ինստիտուտի ընթերցասրահ:
