02.12.2014
Մոսկվայում նոյեմբերի 27-28 – ը կայացավ IV միջազգային գիտական-գործնական «1914 թվական`խաղաղությունից պատերազմ. հայացք հարյուր տարի անց» գիտաժողովը:
Գիտաժողովին մասնակցեցին պատմական գիտությունների դոկտոր, Հայոց ցեղասպանության 100-րդ տարելիցի միջոցառումները համակարգող պետական հանձնաժողովի քարտուղար, ՀՑԹԻ տնօրեն Հայկ Դեմոյանը, պատմական գիտությունների թեկնածու, ՀՑԹԻ փոխտնօրեն Սուրեն Մանուկյանը և ՀՑԹԻ գիտաշխատող Ռոբերտ Թաթոյանը:
Հայոց ցեղասպանության թանգարան-ինստիտուտի տնօրեն Հայկ Դեմոյանը հանդես եկավ «Գերմանական ծագմամբ օսմանյան ջիհադը. Օսմանյան կայսրության կողմից Առաջին համաշխարհային պատերազմի սկզբին Սրբազան պատերազմի հայտարարման գերմանական հետքի հարցի շուրջ» զեկույցով: ՀՑԹԻ փոխտնօրեն Սուրեն Մանուկյանը կարդաց «Պատիժ հավատարմության համար. Էրզրումի կոնգրեսից մինչև Սարիղամիշի ճակատամարտ» զեկույցը: Հայոց ցեղասպանության թանգարան-ինստիտուտի գիտաշխատող Ռոբերտ Թաթոյանը հանդես եկավ «Արևմտյան Հայաստանի բնակչության էթնիկ կազմը. 1913-1914 թթ. հայկական ռեֆորմների ծրագրի շուրջ ռուս-թուրքական բանակցությունների համատեքստում» զեկույցով:
IV միջազգային գիտական-գործնական գիտաժողովը կազմակերպել էր Առաջին աշխարհամարտն ուսումնասիրող պատմաբանների ռուսաստանյան ընկերակցությունը և Միջազգային անկախ բնապահպանական-քաղաքագիտական համալսարանը: «1914 թվական` խաղաղությունից պատերազմ. հայացք հարյուր տարի անց» գիտաժողովը մտնում է աշխարհում կայացող գիտական և գիտական-գործնական միջոցառումների շարքի մեջ, որոնք նվիրված են 1914-1918 թթ. Առաջին համաշխարհային պատերազմի հարյուրամյակին:
