03.12.2015
Դեկտեմբերի 3-ին ՀՑԹԻ-ում ՀՀ Կրթության և գիտության նախարարը շնորհավորեց և պարգևատրեց «Հիշում եմ և պահանջում» թեմայով շարադրությունների մրցույթում հաղթած 15 դպրոցականի:
Մրցույթն ընթացել է երեք փուլով: Հայտարարված բաց մրցույթին Հայաստանի տարբեր մարզերի դպրոցականներից ստացվել է հազարից ավելի շարադրություն: Վերջնական արդյունքում ընտրվել է տասնհինգը:
ԿԳՆ նախարար Արմեն Աշոտյանի խոսքով գնահատման չափանիշ են եղել շարադրությունների հեղինակների անկեղծությունը, հայրենասիրական ջերմ զգացմունքները, դպրոցականների հիշողությունը՝ կապված իրենց արմատների հետ: Նախարարը կարևորեց 2015 թվականի ընթացքում կայացած բոլոր հանրակրթական ձեռնարկները, որ նվիրված էին Հայոց ցեղասպանության 100-րդ տարելիցին՝ նշելով նաև «Պատվո պահակ» նախաձեռնությունը, որի շրջանակում մի քանի շաբաթ Երևանի տարբեր դպրոցների աշակերտներ հերթագայությամբ պատվո պահակ են կանգնել Ծիծեռնակաբերդի հուշահամալիրում:
Ներկաներին շնորհավորեց նաև ՀՑԹԻ փոխտնօրեն Սուրեն Մանուկյանը: Նա դպրոցականներին պատմեց Ավրորա Մարդիգանյանի մասին, ով հարյուր տարի առաջ դեռատի հասակում վերապրելով Հայոց ցեղասպանությունը, անցնելով պատերազմի ու կոտորածի բոլոր սարսափների միջով՝ կարողացել է իր պատմությունը պատմել աշխարհին:
Պարգևատրման արարողության մասնակիցներն այնուհետև շրջեցին Հայոց ցեղասպանության թանգարանի սրահներում:
