04.10.2014

Հոլոքոստի ուսումնասիրության ուկրաինական «Տկումա» («Վերածնունդ») կենտրոնի հրավերով՝ ՀՑԹԻ աշխատակից Ռոբերտ Թաթոյանը 2014 թ. սեպտեմբերի 28-29-ին Ուկրաինայի Դնեպրոպետրվսկ քաղաքում մասնակցել է Բաբիյ Յարի ողբերգության 73-րդ տարելիցին նվիրված ոգեկոչման արարողությանն, ինչպես նաև արարողության շրջանակներում կազմակերպված մի շարք այլ միջոցառումների, այդ թվում՝ «Բռնապետությունը և ժողովրդավարությունը ծայրահեղությունների դարաշրջանում» գերմանական շրջիկ ցուցադրության բացմանը և «Պատերազմի և Հոլոքոստի դասերը» ստեղծագործական աշխատանքների մրցույթի արդյունքների ամփոփմանը։

Ոգեկոչման արարողության ընթացքում իր ունեցած խոսքում Ռոբերտ Թաթոյանն անդրադարձել է հրեական Հոլոքոստի և Հայոց ցեղասպանության միջև զուգահեռներին, նշվել է, որ այսօր ինչպես երբեք կարևոր է, որպեսզի հայ, հրեա և ցեղասպանություն վերապրած այլ ժողովուրդների հիշողությունը դառնա ամբողջ մարդկության ընդհանրական հիշողության մաս, ինչը թույլ կտա ավելի կայուն հիմքեր ստեղծել հետագայում նման հանցագործություններին հակազդելու համար։

Ոգեկոչման արարողությանը ներկա էին Դնեպրոպետրովսկի գլխավոր ռաբբի Շմուել Կամինեցկին, Ուկրաինայում Գերմանիայի գլխավոր հյուպատոս դոկտոր Դետլեֆ Վոլտերը, Դկեպրոպետրվսկի մարզպետի խորհրդական Բորիս Տրեյգերմանը և ուրիշներ։

Բաբիյ Յարը Կիև քաղաքի մոտ գտնվող բնավայր է, որտեղ 1941 թ. սեպտեմբերի 29-30-ի ընթացքում գերմանացի ֆաշիստները զանգվածային գնդակահարության են ենթարկել ավելի քան 100,000 մարդու՝ հիմնականում ուկրաինացի հրեաների։ Բաբիյ Յարի ողբերգությունը համարվում է Հոլոքոսթի ամենասարսափելի դրվագներից մեկը։