Հայոց ցեղասպանության թանգարան-ինստիտուտի կայքէջը հաղթող ճանաչվեց «ArmNet Awards 2011» համահայկական վեբ-մրցույթում: Համաձայն մրցանակաբաշխության պայմանների, մրցույթին մասնակցել են այն կայքերը, որոնք ստեղծվել են 2009-2011 թթ. ընթացքում, կամ վերոհիշյալ ժամանակահատվածում ենթարկվել են նկատելի փոփոխության (դիզայնի, բովանդակության, կիրառվող տեխնոլոգիայի): Մրցույթին ներկայացված կայքէջերը նախատեսված են եղել հայկական (Հայաստան կամ սփյուռք) շուկայի համար, կամ ներկայացրել են Հայաստանի, հայերի, հայկական սփյուռքի մշակույթը, պատմությունը, խնդիրները կամ ամբողջովին պատրաստված են Հայաստանում գրանցված ընկերության կողմից: Մրցույթին ներկայացվել են շուրջ 650 կայքէջ:
ՀՑԹԻ կայքէջը հաղթող ճանաչվեց մրցանակային ութ անվանակարգերից «Լավագույն բովանդակություն» անվանակարգում` օրիգինալ, հետաքրքիր և գրագետ բովանդակության համար:
Հիշեցնենք, որ սա ՀՑԹԻ կայքէջի երկրորդ համանման հաջողությունն է: 2008 թ. ՀՑԹԻ կայքէջը էլեկտրոնային բովանդակության համահայկական մրցույթում արժանացել էր գլխավոր մրցանակի, ինչպես նաև հաղթող էր ճանաչվել էլ-գիտություն անվանակարգում: Մանրամասն տե´ս` http://genocide-museum.am/arm/17.01.2009.php կայքէջում:
