05.12.2018
Լիդիցեի գեղեցիկ արվեստների մանկական կերպարվեստի միջազգային մրցույթի ամփոփումն ու ցուցահանդեսի կազմակերպումը Հայոց ցեղասպանության թանգարան-ինստիտուտի տանիքի տակ արդեն գեղեցիկ ավանդույթ է դարձել:
Լիդիցեի գեղեցիկ արվեստների 46-րդ միջազգային պատանեկան ցուցահանդեսի մրցանակակիրների պարգևատրման արարողությանը ողջույնի խոսքով հանդես եկավ ՀՀ-ում Չեխիայի Հանրապետության արտակարգ և լիազոր դեսպան Պետր Միկիսկան, ով և հանձնեց մրցանակները: Պարոն դեսպանը կարևորեց ՀՑԹԻ – Չեխիայի դեսպանատան համագործակցությունը և շնորհակալություն հայտնեց յուրաքանչյուր տարի միջոցառմանն աջակցելու համար:
Ողջույնի խոսքով հանդես եկավ նաև ՀՑԹԻ փոխտնօրեն Լուսինե Աբրահամյանը.
«Ուրախ եմ ձեզ ողջունել և հյուրընկալել Հայոց ցեղասպանության թանգարան-ինստիտուտում: Թույլ տվեք ամենից առաջ ընդգծել ցուցահանդեսի կարևորությունը և շնորհակալություն հայտնել կազմակերպիչներին, որ տարիներ շարունակ այդքան դրական գործունեությամբ միավորում են երեխաներին աշխարհի տարբեր ծայրերից: Այս ցուցահանդեսը Լիդիցեի ողբերգության, ցեղասպանությունների ու պատերազմների զոհ դարձած երեխաների հիշատակը վառ պահելու յուրահատուկ ձև է: Միաժամանակ այն կարևոր ազդակ է՝ երեխաներին խաղաղ մանկություն ապահովելու մեր պարտականության մասին:
Սիրելի՛ երեխաներ, հպարտ եմ ձեր ընկերակցությամբ այս ջերմ միջավայրում գտնվելու համար: Սրահում ներկայացված ձեր աշխատանքներն անսպառ դրական լիցքեր և էներգիա են հաղորդում: Կրկնակի հպարտ եմ, որ հային բնորոշ ստեղծարարությամբ ու տաղանդով ներկայացրել եք ձեր աշխատանքները մեծ արժեք և կարևորություն ունեցող միջազգային ցուցահանդեսում: Ինչպես ամեն տարի, այս տարի ձեր աշխատանքներով գերազանց արդյունքներ եք գրանցել, և շատերդ արժանացել եք պատվավոր մրցանակների: Շնորհավորում եմ բոլորիդ և մաղթում նորանոր հաջողություններ»:
2018թ. ցուցահանդես-մրցույթի թեման եղել է Ջուրը, իսկ 2019 թ. մրցույթի թեման կլինի Քիմիան:
Լիդիցեի գեղեցիկ արվեստների միջազգային պատանեկան ցուցահանդեսը հիմնվել է 1967 թ` ի հիշատակ չեխական Լիդիցե գյուղում գերմանացի նացիստների կողմից սպանված և պատերազմի ընթացքում զոհված երեխաների:
