Հունիսի 8-ին ՀՑԹԻ հիմնադրամի գիտաժողովների սրահում տեղի ունեցավ հայտնի լիբանանցի հրատարակիչ, մշակութային գործիչ Նաճի Նաամանի հետ հանդիպում-քննարկում:

Նաճի Նաամանն արաբական մշակույթը քարոզող իր բազմաթիվ հրատարակությունների կողքին ներկայացրել է նաև հայկական մշակույթին ու պատմությանն առնչվող մոտ քսան գիրք՝ արաբերեն, ֆրանսերեն, հայերեն լեզուներով:

Այդ շարքում առանձնահատուկ տեղ է զբաղեցնում Հայոց ցեղասպանությանը՝ մասնավորապես Մարդինի հայության կոտորածին և նրա հոգևոր առաջնորդ, հայ կաթոլիկ հոգևորական Իգնատիոս արքեպիսկոպոս Մալոյանին (1869-1915 թթ.) նվիրված երկու գրքերի հրատարակությունը՝ «Մարտին. հերոս քաղաք», «Իգնատիոս Մալոյեան: Մարդը եւ նահատակը»:

Հայոց ցեղասպանության 100-րդ տարելիցին Նաճի Նաամանը նախաձեռնեց ու հրատարակեց «Հարյուր և… ցեղասպանությունը կշարունակվի» խորագրով, 510 էջանոց հատոր, որտեղ տեղ են գտել արաբ և օտարազգի տարբեր քաղաքական գործիչների, ցեղասպանության ականատեսների, գրողների, մտավորականների, հասարակական գործիչների վկայությունները Հայոց ցեղասպանության մասին:

Նաճի Նաամանը, Հայոց ցեղասպանության ուսումնասիրման ու ճանաչման գործում ունեցած ավանդի համար, ՀՑԹԻ տնօրեն Հարություն Մարությանի կողմից պարգևատրվեց «Ավրորա Մարդիգանյան» հուշամեդալով:

«Մեծ պատիվ է ստանալ Ավրորա Մարդիգանյանի անվան հուշամեդալ, ես նրա մասին տեղեկացել եմ թանգարանի կայքէջից, տեղյակ եմ նրա կյանքի ոդիսականից»,- նշեց արաբ հրատարակիչը:

Արաբ գործչի ու նրա հայանպաստ գործունեության մասին մանրամասներ ներկայացրեց ՀՑԹԻ հուշագրությունների, վավերագրերի և մամուլի բաժնի վարիչ, բանասեր Միհրան Մինասյանը:

Նաճի Նաամանն իր հերթին պարոն Մարությանին ու պարոն Մինասյանին հանձնեց շնորհակալագրեր ցուցաբերած ուշադրության ու աջակցության համար: