10.04.2019
Իտալիայի խորհրդարանի ստորին պալատը ապրիլի 10-ին բանաձև է ընդունել, որը կոչ է անում երկրի կառավարությանը պաշտոնապես ճանաչել Հայոց ցեղասպանությունը և միջազգային մակարդակում բարձրացնել այդ հարցը: Բանաձևի օգտին քվեարկել է 382 պատգամավոր, դեմ չի եղել, 43 պատգամավորները ձեռնպահ են քվեարկել:

Ընդունված փաստաթղթում ասվում է. «20-րդ դարում տեղի ունեցած դաժանություններն ու վայրագությունները ճանաչելն ու հիշատակելը պետք է մշտական զգուշացում լինեն»:

Տեքստում հղում է արվում նաև 1973թ. ՄԱԿ-ի մարդու իրավունքների հանձնաժողովի կողմից 1915-1917թթ. Օսմանյան կայսրությունում 1.5 մլն հայերի բնաջնջումը ցեղասպանություն որակող որոշմանը, 2015-ին Եվրախորհրդարանի կողմից նմանատիպ որոշմամբ բոլոր անդամ երկրներին ուղղված ցեղասպանությունը ճանաչելու կոչին, ինչպես նաև Հռոմի Պապի կողմից Հայոց ցեղասպանությունը որպես 20-րդ դարի առաջին ցեղասպանություն որակելուն:

Հիշեցնենք, որ Իտալիայի տեղական իշխանությունների բազմաթիվ մարմիններ ավելի վաղ արդեն ճանաչել են Հայոց ցեղասպանությունը: