10.08.2024


Հուլիսի 25-26-ը Ցեղասպանագետների միջազգային ասոցիացիան [IAGS- International Association of Genocide Scholars] կազմակերպել էր «IAGS Virtual Conference: Teaching About Genocide» խորագրով առցանց միջազգային գիտաժողով, որին մասնակցում էին քսանից ավել ցեղասպանագետներ, պատմաբաններ և հարակից ոլորտների մասնագետներ աշխարհի տարբեր երկրներից: Գիտաժողովի ընթացքում ներկայացվեցին քսանից ավելի զեկույցներ:

Հայոց ցեղասպանության թանգարան-ինստիտուտից գիտաժողովին մասնակցում էր Կրթական ծրագրերի պատասխանատու Ինեսա Ստեփանյանը, որը ներկայացրեց «The Issue of Teaching the Topic of the Armenian Genocide: Testimonies and Individuals Stories» [Հայոց ցեղասպանության թեմայի ուսուցման շուրջ. վկայություններ և անհատների պատմություններ] վերնագրով զեկույցը: Իր խոսքում Ինեսա Ստեփանյանը նշեց, որ Հայոց ցեղասպանության թանգարան-ինստիտուտը 2014 թ.-ին, ապա 2019-2024 թթ. իրականացրել է կրթական ծրագրեր, որոնք նախատեսված են եղել ինչպես միջնակարգ (VIII-IX դասարաններ) և ավագ դպրոցների (X, XI, XII դասարաններ) աշակերտների, այնպես էլ ուսուցիչների համար։ Այնուհետև ներկայացրեց ՀՑԹԻ-ի կրթական ծրագրերի էվոլյուցիան և օգտակարությունը, ապա նշեց դրանցում ականատես-վերապրածների անհատական պատմությունների և նրանց անձնական ճակատագրերի ու փորձառնությունների ունեցած դերի մասին:

Գիտաժողովին երիտասարդ գիտաշխատողների հետ միասին մասնակցում էին նաև անվանի ցեղասպանագետներ, մասնավորապես Ջոյս Ապսելը և Հենրի Թերիոն: