14.04.2023
Հիշողության կամ եղևնիների պուրակը Հայոց ցեղասպանության հուշահամալիրի չորս հիմնական մասերից մեկն է: Հիշողության պուրակում առաջին թվագրված ծառը ԱՄՆ սենատոր Բոբ (Ռոբերտ) Դոուլի 1997 թվականին տնկած եղևնին է՝ ի հիշատակ Հայոց ցեղասպանությունը վերապրած ամերիկահայ վիրաբույժ Համբար Քելիկյանի:
1991 թ. Հայաստանի Հանրապետության անկախության հռչակումից ի վեր տարբեր երկրներից ժամանած պաշտոնական պատվիրակությունների այցը Հայոց ցեղասպանության հուշահամալիր դառնում է ավանդույթ, իսկ արդեն 2002 թ. մարտի 16-ից ՀՀ պետական արարողակարգի ծառայության մասին օրենքով` պետական արարողակարգի անբաժան մաս:
Հիմնադրման օրվանից մինչ օրս Հիշողության պուրակի վեց տեղամասերում տնկվել է ավելի քան 210 եղևնի և, բնականաբար, ժամանակի ընթացքում առաջացավ տարածքն ընդարձակելու և բարեկարգելու խնդիր: ՀՑԹԻ տնօրենության երեք տարվա համառ ջանքերի և հետևողական կերպով խնդրի մասին անընդհատ բարձրաձայնելու արդյունքում, 2022 թ. նոյեմբեր ամսին ԿԳՄՍ նախարարության ֆինանսավորմամբ սկսվեց Հիշողության պուրակի տարածքն ընդարձակելու աշխատանքները: Քանի որ տարածքը բավականին քարքարոտ էր, բերվեց հատուկ տեխնիկա, որի միջոցով հսկայական քարեր հանվեցին դրանց փոխարեն տարածքը հարստացվեց սևահողով: Կատարված աշխատանքի արդյունքում Հիշողության պուրակի տարածքն ընդարձակվել է 640 մ2-ով:
Տարածքի ընդարձակման աշխատանքներին հաջորդեցին նոր տեղամասի և շրջակա տարածքի բարեկարգման աշխատանքները: Դրանք իրականացրեցին ՀՑԹԻ «Ծիծեռնակաբերդ» զբոսայգու աշխատակիցները, մասնավորապես նորացվեցին ոռոգման և ջրահեռացման համակարգերը, իսկ «Էյ Թի Փի» բարեգործական հիմնադրամի (ATP-Armenian Tree Project) տրամադրած տնկանյութերով գեղեցկացվեց միջավայրը:
Հիշողության պուրակի նոր բարեկարգված տեղամասն արդեն ամբողջությամբ պատրաստ է: Նշենք, որ Հիշողության պուրակում ծառերը տնկվում են ՀՀ ԱԳ նախարարության պետական արարողակարգի ծառայության որոշումով՝ «Հայոց ցեղասպանության թանգարան-ինստիտուտ» հիմնադրամի համաձայնությամբ: Հայաստան ժամանող բարձրաստիճան հյուրերը հիշողության պուրակում եղևնիներ տնկելու միջոցով ոչ միայն ոգեկոչում են Հայոց ցեղասպանության զոհերին, այլ նաև Ցեղասպանության հիշողության պահպանման և փոխանցման յուրօրինակ առաքելություն են իրականացնում:
