14.04.2023
Բանախոս՝ Գոհար Խանումյան, ՀՑԹԻ թանգարանային ֆոնդերի բաժնի վարիչ, գլխավոր ֆոնդապահ
Թեմա՝ Նեմեսիս, վրիժառություն, պատժիչ գործողություն, թե՞ արդարադատության իրականացում
Դպրոց՝ Արցախի «Շիրակացու ճեմարան» գիտակրթական համալիր, 10-11-րդ դասարաններ
Ապրիլի 14-ին ՀՑԹԻ գիտաժողովների սրահում տեղի ունեցած դպրոցականների համար մշակված կրթական ծրագրերի 2023 թ. հերթական հանդիպումը առանձնացավ մինչ այս եղած հանդիպումներից: Առաջին անգամն էր, որ կրթական ծրագրին մասնակցում էր կրթօջախ Արցախի հանրապետությունից: Արդեն չորս ամսից ավել է, ինչ Ադրբեջանը շրջափակել է Լաչինի միջանցքը՝ կտրելով Արցախի կապը արտաքին աշխարհի հետ: Այդ իսկ պատճառով դասախոսությունը տեղի ունեցավ առցանց տարբերակով: Արցախցի աշակերտները ներկայացված թեմաներից ընտրել էին ՀՑԹԻ թանգարանային ֆոնդերի բաժնի վարիչ, գլխավոր ֆոնդապահ Գոհար Խանումյանի «Նեմեսիս, վրիժառություն, պատժիչ գործողություն, թե՞ արդարադատության իրականացում» վերնագրով դասախոսությունը:
Գոհար Խանումյանը դասախոսության ընթացքում անդրադարձ կատարեց 1919 թ. աշնանը Երևանում գումարված ՀՅԴ 9-րդ Ընդհանուր ժողովում կայացված խիստ գաղտնի որոշմանը, որով նախատեսվում էր մահապատժի ենթարկել Հայոց ցեղասպանության կազմակերպիչներին և իրականացնողներին, այդ գործողությունը կոչվեց «Հատուկ գործ», որն ավելի հայտնի է «Նեմեսիս» ծածկանունով: Այն վստահվեց ՀՅԴ Հատուկ կամ Պատասխանատու մարմնին:
Բանախոսը հետաքրքիր փաստեր ներկայացրեց Նեմեսիսի կազմակերպիչների, անդամների, բուն գործողություններն իրականացրած հայ մարտիկների մասին: Դասախոսությունն ավարտվեց հարցուպատասխանով:
