2010 թվականի դեկտեմբերի 14-ից 15-ը Հայաստանի Հանրապետության Արտաքին գործերի նախարարությունը Հայոց ցեղասպանության թանգարան-ինստիտուտի հետ համատեղ կազմակերպեց «Ցեղասպանության հանցագործությունը. կանխարգելում, դատապարտում և հետևանքների վերացում» խորագրով միջազգային գիտաժողով:
Խորհրդաժողովը մեկնարկվեց ՀՀ Արտաքին գործերի նախարար Էդվարդ Նալբանդյանի խոսքով, որին հաջորդեց ՀՀ նախագահ Սերժ Սարգսյանի Ցեղասպանության կանխարգելման և դատապարտման վերաբերյալ ելույթը. «Այսօր, առավել քան երբևէ, ցեղասպանությունների կանխարգելման համար լուրջ նախաձեռնություններ իրականացնելու և գործուն մեխանիզմներ մշակելու անհրաժեշտություն է առաջացել: Եվ այսօր, առավել քան երբևէ, ակնհայտ է, որ նախկինում իրագործված ցեղասպանությունների համար քաղաքական տարբեր վարչակազմերի ու պետությունների անպատիժ մնալու, միջազգային հանրության կողմից չդատապարտվելու, կանխարգելման համապատասխան և համարժեք մեխանիզմների բացակայության կամ անկատարության հանգամանքները հանգեցրել են նրան, որ մարդկությունը, ի թիվս այլ լրջագույն մարտահրավերների, դեռևս բախվում է նոր ցեղասպանությունների իրականացման սպառնալիքի հետ:
Հայոց ցեղասպանության դառը դասերը, մարդկության պատմության ու հիշողության մեջ չմնացին որպես անցյալի լոկ հուշեր. դրանց լրացնելու եկան Հոլոքոստի սարսափները, Ռուանդայի, Դարֆուրի և բազմաթիվ այլ ողբերգություններ: Ցավոք, ժխտողականությունն ու ցեղասպանության ուրացումը դեռևս շարունակում են տեղ գտնել աշխարհում: Քաղաքական նպատակահարմարությունն ու կարճատես պատեհապաշտությունը հաճախ գերակշռում են առողջ, խելամիտ որոշումների ընդունման ու քայլերի իրականացման ընթացքում»:
Աշխարհի ավելի քան 20 երկրից ժամանած նշանավոր ցեղասպանագետները մասնակցեցին այս գիտաժողովին. Իվ Տերնոն (Ֆրանսիա), Լեանդրո Դեսպուի (Արգենտինա), Իսրայել Չառնի (Իսրայել), Դոննա-Լի Ֆրիզ (Ավստրալիա), Վիլյամ Շաբաս (Իռլանդիա), Ֆրանսուա Ռոլան դյու Վիվիե (Բելգիա), Թաներ Աքչամ (ԱՄՆ-Գերմանիա), Ռիչարդ Հովհաննիսյան (ԱՄՆ), Թեսսա Հոֆման (Գերմանիա), Այման Աբդել Ազիզ Սալամա (Եգիպտոս), Ֆրենք Չոք (Կանադա), Մաթիաս Բյորնլանդ (Դանիա), Մոհամմեդ Ռիֆաթ (Եգիպտոս), Թեոֆանիս Մալկիդիս (Հունաստան), Ռուբեն Սաֆրաստյան (Հայաստան), Էնցո Մարիա Լե Ֆեվր (Իտալիա/Հունգարիա), Տեցուշի Օգատա (Ճապոնիա), Տիգրան Կույումջյան (ԱՄՆ-Ֆրանսիա), Էնթոնի Հոլսլախ (Նիդերլանդներ), Արմեն Մարսուբյան (ԱՄՆ), Փիթեր Բալաքյան (ԱՄՆ), Վաիլ Նիկոլաս Կեյր (Լիբանան), Սեդա Պարսամյան (Հայաստան):
Խորհրդաժողովը կազմված էր չորս նիստից, որը վարում էին Արտաքին գործերի նախարարի տեղակալ Արման Կիրակոսյանը, ՀՀ ԳԱԱ Արևելագիտության ինստիտուտի տնօրենի խորհրդական Նիկոլայ Հովհանիսյանը, Հայոց Ցեղասպանության թանգարան – ինստիտուտի տնօրեն Հայկ Դեմոյանը, Հայաստանի Սահմանադրական դատարանի անդամ Վլադիմիր Վարդանյանը:
