16.07.2022
Օրերս Հայոց ցեղասպանության թանգարան այցելած Բելգիայում բնակվող հայտնի փիլիսոփա, իսլամ և համամարդկային արժեքների քարոզիչ Շեյխ Իմրան Հուսեյնը ցանկություն էր հայտնել Ծիծեռնակաբերդի բարձունքում տնկել արծաթափայլ եղևնի:
Շեյխ Իմրան Նազար Հուսեյնը համարվում է Ղուրանի այն եզակի մեկնաբաններից, որը մասնագիտացած է իսլամական կատարածաբանության, համաշխարհային քաղաքականության, տնտեսագիտության, ժամանակակից սոցիալ-տնտեսական, քաղաքական և միջազգային հարցերում: Հեղինակ է «Երուսաղեմը Ղուրանում» և այլ գրքերի։
Նա խիստ ելույթով հանդես է եկել 44-օրյա պատերազմի ընթացքում՝ դատապարտելով Ադրբեջանին և Թուրքիային։
Ընդառաջելով իսլամ վարդապետի ցանկությանը՝ ՀՑԹԻ տնօրենությունը կազմակերպեց այդ ծառատունկը: Այսօր՝ հուլիսի 16-ին, Հիշողության պուրակի մերձակա տարածքում Շեյխ Իմրան Հուսեյնը տնկեց արծաթափայլ եղևնի՝ ի հիշատակ Հայոց ցեղասպանության զոհերի: Ծիծեռնակաբերդի բարձունքում նա իր աղոթքի ձայնը բարձացրեց Հայոց ցեղասպանության մեկ ու կես միլիոն անմեղ զոհերի հոգիների հանգստության համար: ՀՑԹԻ տնօրեն Հարություն Մարությանը հյուրին ներկայացրեց Հիշողության պուրակի և դրան կից կանգնեցված երեք խաչքարերի ստեղծման պատմությունը, որոնք նվիրված են անցյալ դարավերջին Ադրբեջանի տարածքում հայ բնակչության նկատմամբ իրականացված էթնիկ զտումների ընթացքում զոհված հայերի հիշատակին:
Շեյխ Իմրան Հուսեյնը շնորհակալություն հայտնեց ՀՑԹԻ տնօրեն Հարություն Մարությանին ընձեռված հնարավորության համար։
Շեյխ Իմրան Հուսեյնի հայաստանյան այցը կազմակերպել է Արևմտահայության ազգային գերագույն խորհրդի հիմնադիր մարմինը, ի դեմս հիմնադիր մարմնի նախագահ Գառնիկ Սարգսյանի:
