16.04.2022


Ս. թ. ապրիլի 15-ին՝ ժամը 14:30-ին, Հայոց ցեղասպանության թանգարան-ինստիտուտի գիտաժողովների սրահում տեղի ունեցավ ավստրալահայ գրականագետ, “The Armenian Genocide: Prelude and Aftermath. As reported in the U.S. Press” (Հայոց ցեղասպանություն. նախերգանք և հետգրություն: Հաղոդումներ ամերիկյան մամուլում) բազմահատորյակի համահեղինակ Արա Քեթիպեանի կազմած նոր գիրքի՝ “Forced Conversions in Ottoman Turkey: Reports from The U.S. Press (1895-1920)” (Բռնի կրոնափոխումը Օսմանյան Թուրքիայում. հաղորդումներ ամերիկյան մամուլից (1895-1920)), շնորհանդեսը:

Հյուրերին բացման խոսքով ողջունեց ՀՑԹԻ տնօրեն Հարություն Մարությանը՝ կարևորելով մատենաշարի ներդրումը հայագիտության, Հայոց ցեղասպանության ուսումնասիրության ոլորտում և հավելեց, որ նոր աշխատությունը հետազոտողների համար ուսումնասիրության հարուստ նյութ է պարունակում։ «Մենք տեսնում ենք, որ, ամերիկյան հասարակությունը տեղեկացված էր հայոց ցեղասպանության մասին, և նաև դրանով էր պայմանավորված ցեղասպանության տարիներին և դրանից հետո նրանց ցուցաբերած մարդասիրական մեծ օժանդակությունը»,— նշեց ՀՑԹԻ տնօրենը։

Արա Քեթիպեանն ընդգծեց, որ գրքում ներկայացված չէ միայն ամերիկյան մամուլի չոր արձագանքը. ընթերցողներն այնտեղ կգտնեն հայտարարություններ, դիվանագետների մեկնաբանություններ, քաղաքական գործիչների կարծիքներ, դեսպանների և հյուպատոսների արձագանքներ։ «Կոտորածների, տեղահանությունների մասին շատ է գրվել, բայց բռնի կրոնափոխությունների մասին տեղեկություններ, այն էլ անգլերենով, այդքան էլ շատ չեն։ Կրոնափոխությունների ժամանակ երեխաների բռնի թրքացման, ինչպես նաև թուրքերի հետ կանանց բռնի ամուսնությունների բազմաթիվ դեպքեր են եղել. դրանց ավելի հանգամանորեն եմ անդրադարձել»,— ընդգծեց գրքի հեղինակը։

ՀՑԹԻ Հայոց ցեղասպանության զոհերի ու վերապրողների փաստագրման և ուսումնասիրության բաժնի վարիչ, պ. գ. թ. Շուշան Խաչատրյանը ևս կարևորեց գրքի լույսընծայումը և նշեց, որ այն մեծ ձեռքբերում է հատկապես Հայոց ցեղասպանության մեջ կրոնի դերն ուսումնասիրող հետազոտողների համար։

Շնորհանդեսի ավարտին ներկաները նաև հնարավորություն ունեցան հեղինակին հարցեր ուղղելու: