17.06.2023
Երեկ՝ հունիսի 16-ին, ՀՑԹԻ գիտաժողովների սրահում տեղի ունեցավ Հայոց ցեղասպանության թանգարան-ինստիտուտի և Խաչատուր Աբովյանի անվան հայկական պետական մանկավարժական համալսարանի կազմակերպած «Ուսյալ ազգի վկայագրերը» մրցույթի ամփոփիչ մասի և մրցանակների հանձնման հանդիսավոր արարողությունը, որին ներկա էին ՀՑԹԻ աշխատակիցները, ՀՊՄՀ պրոֆեսորադասախոսական անձնակազմը, ուսանողներ և այլք: Մրցույթ անցկացնելու գաղափարն առաջացել էր դեռ անցած տարվա նոյեմբեր ամսին, երբ ՀՑԹԻ-ի նախաձեռնությամբ ՀՊՄՀ իր 100–ամյակի կապակցությամբ հյուրընկալեց «Հայկական վարժարանների հետքերով. ուսյալ ազգի վկայագրերը» խորագրով շրջիկ ցուցադրությունը:
Նախքան մրցույթի ամփոփումը միջոցառման մասնակիցներն այցելեցին Հայոց ցեղասպանության հուշահամալիր, ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության անմեղ զոհերի հիշատակը:
Արդեն գիտաժողովների սրահում ներկաներին ողջունեցին և մրցույթի մասնակիցներին հաջողություններ մաղթեցին ՀՑԹԻ գիտական աշխատանքների գծով փոխտնօրեն, պ.գ.թ. Էդիտա Գզոյանը և ՀՊՄՀ Մանկավարժության ամբիոնի վարիչ, մանկ. գիտ. դոկտոր, պրոֆեսոր Աիդա Թոփուզյանը: Վերջինս ՀՑԹԻ-ին հանձնեց մրցույթին ներկայացված բոլոր աշխատանքները: Այդ աշխատանքներում ներկայացված են արևմտահայ և Օսմանյան կայսրության հայաբնակ վայրերի կրթօջախները, դրանց դերը ազգային ինքնության պահպանման գործում: Էդիտա Գզոյանը շնորհակալություն հայտնեց կատարված աշխատանքի համար, և հույս հայտնեց, որ հետագա համագործակցության շրջանակներում ուսանողները կներգրավվեն համատեղ այլ ծրագրերի մեջ:
Այնուհետև ներկայացվեցին մրցույթին մասնակցած ՀՊՄՀ տարբեր ֆակուլտետների ուսանողների և դասախոսների պատրաստած և եզրափակիչ փուլ անցած երեք նախագծերը, և ժյուրիի անդամներն ընտրեցին հաղթողին: Ի դեպ, ժյուրիի կազմում էին ընդգրկվել նաև ՀՑԹԻ ցուցադրությունների կազմակերպման պատասխանատու, «Հայկական վարժարանների հետքերով. ուսյալ ազգի վկայագրերը» խորագրով ցուցադրության հեղինակ Սեդա Պարսամյանը և ՀՑԹԻ կրթական ծրագրերի պատասխանատու Ինեսա Ստեփանյանը: Մրցանակակիրներին Աիդա Թոփուզյանը հանձնեց պատվոգրեր: Հայոց ցեղասպանության թանգարան-ինստիտուտը նվիրեց մրցանակակիրներին «Հայոց ցեղասպանությունը վերապրածների հուշագրություններ» մատենաշարի գրքերից:
Միջոցառման ավարտին ուսանողներն ու դասախոսները շրջեցին նաև Հայոց ցեղասպանության թանգարանում, որտեղ ՀՑԹԻ ավագ էքսկուրսավար Անժել Թևեքելյանի ուղեկցությամբ ծանոթացան մշտական և ժամանակավոր ցուցադրություններին:
