Աշխատանքային այցով Հայաստան ժամանած Ֆրանսիական Հանրապետության պատվիրակությունը սեպտեմբերի 17-ին այցելեց Հայոց ցեղասպանության հուշահամալիր՝ ՀՀ Ազգային ժողովի Եվրոպական ինտեգրման հարցերի մշտական հանձնաժողովի նախագահ Արման Եղոյանի ուղեկցությամբ:
Հյուրերին դիմավորեց Հայոց ցեղասպանության թանգարան-ինստիտուտի թանգարանային աշխատանքների գծով փոխտնօրեն Լուսինե Աբրահամյանը: Հուշահամալիրի ստեղծման պատմությունը ներկայացրեց Հայոց ցեղասպանության թանգարանի էքսկուրսավար Հասմիկ Մարտիրոսյանը:
Ֆրանսիացի հյուրերը ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության անմեղ զոհերի հիշատակը: Նրանք շրջեցին նաև Հայոց ցեղասպանության թանգարանում, ծանոթացան մշտական և ժամանակավոր ցուցադրություններին, գրառում կատարեցին Պատվավոր հյուրերի հուշամատյանում:
«Պետք է փրկել հայերին», Ժան Ժորես (1896), «Պետք է փրկել արցախցիներին», 17 սեպտեմբերի 2021»,-գրել է Ֆրասիական պառլամենտի անդամ, Ֆրանսիայի կողմից Հայոց ցեղասպանության ճանաչման օրենքի զեկուցող Ֆրանսուա Ռոշեբլուանը:
«Նույն հուզմունքը ունեցա, ինչ ունեցել էի Յադ Վաշեմում, Երուսաղեմում: Դժբախտաբար, երկու ցեղասպանությունները միևնույն ճանաչումը չունեն աշխարհում: Այս թանգարանը պիտի ցուցադրվեր աշխարհի բոլոր երկրներում»,- գրել է Բուք Բել Էղի (Bouc-Bel-Air) քաղաքապետ Ռիշար Մալլիեն:
Այցի ավարտին ֆրանսիացի հյուրերը շրջայց կատարեցին Հիշողության պուրակում:
