19.04.2023
2019 թվականից ՀՑԹԻ-ն իրականացնում է կրթական ծրագրեր, որոնց մասնակցում են Երևանի, ՀՀ մարզերի, ինչպես նաև Արցախի Հանրապետության դպրոցները: ՀՑԹԻ տնօրենությունը, հաշվի առնելով ուսուցիչների և աշակերտների ցուցաբերած հետաքրքրությունը Հայոց ցեղասպանության թեմայով կրթական ծրագրերի նկատմամբ, որոշեց խորացնել կապը հանրակրթական հաստատությունների և Հայոց ցեղասպանության թանգարան-ինստիտուտի միջև:
2022 թվականից կրթական ծրագրի մաս է դարձել նաև Հայոց ցեղասպանության տարբեր թեմաներով շրջիկ ցուցադրությունների կազմակերպումը երևանյան և մարզային կրթօջախներում:
2022 թ. նոյեմբերից Երևանի պետական մանկավարժական համալսարանում, ապա (2023 թ. փետրվարից) նաև երևանյան և մարզային դպրոցներում ներկայացվում է «Օսմանյան կայսրության հայկական վարժարանների հետքերով. ուսյալ ազգի վկայագրերը» խորագրով շրջիկ ցուցադրությունը: Ինչպես նշում է ՀՑԹԻ գիտաշխատող, թանգարանային ցուցադրությունների կազմակերպման պատասխանատու, ցուցադրության հեղինակ Սեդա Պարսամյանը, ծրագիրն ունի նպատակային ուղղվածություն, այն է` ևս մեկ անգամ ընդգծել կրթության դերը՝ որպես ազգի ինքնության և ժառանգության կարևոր մաս, ներկայացնել Արևմտյան Հայաստանում, Կիլիկիայում և Օսմանյան կայսրության հայաշատ այլ վայրերի ազգային կրթօջախները, որոնց գործունեությունը, ցավոք, ընդհատվել է Հայոց ցեղասպանության հետևանքով: Ծրագրի նպատակը աշակերտներին և ուսանողներին հաղորդակից դարձնելն է այն հարուստ մշակութային և կրթական ժառանգությանը, որը հայ ժողովուրդը ստեղծել է իր պատմության ընթացքում: Այսինքն, գիտելիք սերտելուց բացի, շատ կարևոր է նաև ծանոթանալ մեր ժողովրդի մշակութային ավանդույթներին և փոխանցել դրանք: Թեև այդ կրթօջախներն այսօր գոյություն չունեն, սակայն ցուցադրության մեջ ներկայացված բացառիկ վավերագրերը դրանց երբեմնի գոյության և հայկական պատկանելության փաստացի վկայություններն են:
«Օսմանյան կայսրության հայկական վարժարանների հետքերով. ուսյալ ազգի վկայագրերը» խորագրով շրջիկ ցուցադրությունն առ այսօր ներկայացվել է Հայաստանի հետևյալ կրթօջախներում.
• 2022 թ. նոյեմբերին՝ Երևանի պետական մանկավարժական համալսարան,
• 2023 թ. փետրվարի 10-ին՝ Արմավիրի մարզի Ալաշկերտ համայնքի Հրաչյա Քոչարի անվան հիմնական դպրոց,
• 2023 թ. մարտի 6-ին՝ Երևանի Հայրապետ Հայրապետյանի անվան թիվ 78 հիմնական դպրոց,
• 2023 թ. ապրիլի 4-ին՝ Երևանի Լև Տոլստոյի անվան թիվ 128 հիմնական դպրոց,
• 2023 թ. ապրիլի 6-ին՝ Արմավիրի մարզի Արմավիր քաղաքի Զորավար Անդրանիկի անվան թիվ 5 հիմնական դպրոց,
• 2023 թ. ապրիլի 12-ին՝ Կոտայքի մարզի Աբովյան քաղաքի թիվ 2 հիմնական դպրոց,
• 2023 թ. ապրիլի վերջին՝ ցուցադրությունը կներկայացվի Կոտայքի մարզի Արզնի համայնքի Սերգեյ Սարխոշևի անվան հիմնական դպրոցում:
ՀՑԹԻ-ն պատրաստ է համագործակցելու բոլոր շահագրգիռ կրթօջախների հետ:
