19.04.2025


Ապրիլի 19-ին ՀՑԹԻ-ում տեղի ունեցավ հանդիպում «Արմատ և ծիլ» ստեղծագործա֊հետազոտական մրցույթի 2024 թվականի մրցանակակիրների հետ, ովքեր ներկայացրեցին իրենց ընտանիքների պատմությունները և կիսվեցին կատարած ուսումնասիրության փորձով՝ 2025 թվականի մասնակիցների հետ:

Հանդիպմանը ողջույնի խոսքով հանդես եկավ ՀՑԹԻ կրթական ծրագրերի պատասխանատու Ինեսա Ստեփանյանը, ով կարևորեց աշակերտների մասնակցությունը նախագծին և քաջալերեց նրանց շարունակել ուսումնասիրել իրենց արմատներն ու լավ ճանաչել հայրենիքի պատմությունը: Մրցույթի հեղինակ Անի Մանուկյանը երախտիքի խոսք հղեց բոլոր մասնակիցներին, ուսուցիչներին և ՀՑԹԻ-ին՝ ծրագրին աջակցելու համար: Նա նաև ՀՑԹԻ-ի ֆոնդերին հանձնեց Հայոց ցեղասպանության հետևանքով ամերիկյան որբանոցում հայտնված իր տատիկին և պապիկին պատկանող մի շարք փաստաթղթեր և լուսանկարներ: Անի Մանուկյանը և ՀՑԹԻ գլխավոր ֆոնդապահ Գոհար Խանումյանն ընդգծեցին վերապրածների մասունքների՝ թանգարան-ինստիտուտին նվիրաբերելու կարևորությունը՝ նշելով, որ նմանատիպ նյութերը ոչ միայն հարստացնում են թանգարանային պահոցը, այլև արժեքավոր աղբյուր են նոր հետազոտությունների համար:

Հանդիպման ավարտին Ինեսա Ստեփանյանը մասնակիցներին նվիրեց ՀՑԹԻ-ի հրատարակած «Հայոց ցեղասպանությունը վերապրածների հուշագրություններ» մատենաշարի հատորներից: