19.06.2024
Ս.թ հունիսի 3-ին և 4-ին Հարավային Կալիֆոռնիայի համալսարանի Վաշինգտոնի մասնաճյուղում տեղի ունեցավ «Ցեղապանության կոնվենցիայի հեռանկարները 75 տարի անց» [Perspectives on the Genocide Convention – 75 Years Later] խորագրով գիտաժողով:
Գիտաժողովին մասնակցեց նաև Հայոց ցեղասպանության թանգարան-ինստիտուտի Վ.Դադրյանի անվան hամեմտական ցեղասպանագիտության բաժնի վարիչ, պ.գ.թ. Սուրեն Մանուկյանը:
Միավորված ազգերի կազմակերպության Գլխավոր ասամբլեայի կողմից 1948 թ. Ցեղասպանության հանցագործության կանխարգելման և պատժի մասին կոնվենցիան ընդունելուց 75 տարի անց աշխարհը ականատես է լինում հանցագործությունների բազմաթիվ դրվագների: Չնայած ցեղասպանության կանխարգելման միջոցառումները մշակվել են, ցեղասպանության վտանգը պահպանվում է աշխարհի շատ երկրներում և տարածաշրջաններում:
Այս կարևոր տարելիցը հնարավորություն է տալիս գնահատելու ցեղասպանական գործողությունների կանխարգելման և պատժի գործում ձեռք բերված առաջընթացը, միևնույն ժամանակ հասկանալու հանցագործությունների բարդությունը և դրանց շարունակականությունը՝ չնայած գոյություն ունեցող միջազգային օրենքներին: Երկօրյա միջազգային գիտաժողովի ընթացքում քննարկվեցին մասնավորապես հետևյալ հարցերը՝
Արդյո՞ք չարաշահվում է և արժեզրկվում ցեղասպանություն եզրույթը:
Ո՞ր համատեքստում է տերմինն արդարացված և ինչո՞ւ:
Ինչպե՞ս է հանցագործության նկարագրությունը օգնել միջազգային արդարադատությանը` կապված ցեղասպանության դրվագների հետապնդման հետ:
Ինչպե՞ս են սահմանման թերությունները ազդում այս հանցագործությունը կանխելու համաշխարհային ջանքերի վրա:
Ի՞նչ այլ մարտահրավերներ են ազդում վայրագության հանցագործությունների ժամանակին կանխարգելելու վրա:
Ինչպե՞ս կարող են ակադեմիական, դիվանագիտական և հանրային հատվածի համայնքները միասին աշխատել՝ շարունակելու ձգտել խաղաղության գալիք տասնամյակներում:
Ինչպե՞ս են հետազոտություններն ու կրթությունն նպաստում ցեղասպանության կանխարգելմանը և խաղաղ գոյակցությանը:
Սուրեն Մանուկյանը հանդես եկավ «Ակադեմիական հետազոտություն. որո՞նք են ցեղասպանագիտության առաջնահերթություններն այսօր» զեկույցով, որի ընթացքում ներկայացրեց գլոբալ միտումները և պահպանվող բացերը ցեղասպանությունների ուսումնասիրության ոլորտում:
Գիտաժողովի մասնակիցները հնարավորություն ունեցան հանդիպելու ԱՄՆ Հոլոքոստի հուշահամալիրի թանգարանի միջազգային իրազեկման և ցեղասպանության կանխարգելման ոլորտում մասնագիտացած անձնակազմի հետ, որից հետո ծանոթացան թանգարանի ցուցադրությանը:
