«Հայոց ցեղասպանության թանգարան-ինստիտուտ» հիմնադրամի աշխատակազմն իր մտահոգությունն ու վրդովմունքն է հայտնում մեդիահարթակներում, սոցհարթակներում ՀՑԹԻ-ի՝ ի դեմս տնօրեն Հարություն Մարությանի շուրջ ծավալվող և թիրախավորող գործողությունների առնչությամբ։
Նման գործելաոճն անընդունելի է. այն վնասում է ՀՑԹԻ-ին՝ տարատեսակ բացասական շահարկումների տեղիք տալով:
Խիստ դատապարտելի է Հայոց ցեղասպանության հուշահամալիրի անմար կրակի մոտ ցանկացած գործողություն, որը միտված կլինի Հայոց ցեղասպանության նահատակների նվիրական հիշատակը քաղաքական կամ այլ նպատակներով շահարկելուն։
ՀՑԹԻ-ի աշխատակազմը դատապարտում է նման գործելաոճը՝ կոչ անելով զանգվածային լրատվամիջոցներին, անհատներին ու կազմակերպություններին այսուհետ զերծ մնալու թանգարան-ինստիտուտի հեղինակությունը և նրա տնօրենի գործունեությունը խեղաթյուրող և վարկաբեկող տարատեսակ հրապարակումներից։
Միաժամանակ կոչ ենք անում զերծ մնալ ՀՑԹԻ-ի ֆոնդերի հարցի շուրջ շահարկումներից՝ վստահեցնելով, որ ՀՑԹԻ-ի ֆոնդերի հետ կապված ցանկացած հարց լուծվում է մասնագիտական ու պատասխանատու մարմինների ներգրավվածությամբ ու վերահսկողությամբ՝ հիմքում ունենալով ֆոնդի ապահովության գերակայությունը:
ՀՑԹԻ-ն ազգային արժեք ունեցող կառույց է, և այստեղ բացառվում է հակազգային օրակարգ ունեցող ուժերի ազդեցությունը:
Ցավում ենք, որ հիշողության ապրիլքսանչորսյան վիրտուալ երթի նախաձեռնության սկզբնական խորագիրը թյուրընկալումների տեղիք է տվել։ Կրկին վերահաստատում ենք, որ նախաձեռնությունը «Հիշում եմ և պահանջում» կարգախոսի փոփոխության նպատակ չէր հետապնդում։
ՀՑԹԻ-ի աշխատակազմն ամենայն պատասխանատվությամբ վստահեցնում է, որ 25 տարի իր առաքելությունն անշեղորեն իրականացնող թանգարան-ինստիտուտն այսօր էլ կատարում է իր գործառույթները՝ միաժամանակ հավատարիմ մնալով Հայոց ցեղասպանության 100-րդ տարելիցի համահայկական հռչակագրին, այդ թվում` «Հիշում եմ և պահանջում» կարգախոսին։
Նվիրումով՝
«Հայոց ցեղասպանության թանգարան-ինստիտուտ» հիմնադրամի աշխատակազմ
