21.07.2023
Հուլիսի 19-21-ը Հայոց ցեղասպանության թանգարան-ինստիտուտում տեղի ունեցավ «Հայոց ցեղասպանության թեմայի ուսուցում» խորագրով եռօրյա ամառային դպրոցը, որն այս տարի իրականացվում էր The Genocide Education Project (GenEd) ծրագրի հետ համատեղ:
Արդեն հինգերորդ տարին անցկացվող ամառային դպրոցին այս տարի մասնակցեց հայոց պատմության ավելի քան 30 ուսուցիչ Երևանից և մարզերից:
Ամառային դպրոցի մեկնարկը տրվեց ՀՑԹԻ տնօրեն, պ. գ. դ. Հարություն Մարությանի ողջույնի խոսքով, որում գլխավորապես շեշտվեց նման կրթական ծրագրերին ուսուցիչների մասնակցելու և ձեռքբերած գիտելիքներն ու հմտություններն աշակերտներին փոխանցելու կարևորությունը:
Առաջին օր հետևյալ ելույթներով հանդես եկան՝
✅ Հարություն Մարությանը, ՀՑԹԻ տնօրեն, պ.գ.դ., «Հայոց ցեղասպանության դասավանդման հիմնախնդիրները արժեքային կողմնորոշումների համատեքստում»,
✅ Ռոքսան Մաքասջյանը, GenEd ծրագրի և կայքի համահիմնադիր, գործադիր տնօրեն, «Հայոց ցեղասպանության դասավանդում. դիտարկումներ, մոտեցումներ, մեթոդներ»
https://genocideeducation.org կայքի օրինակով,
✅ Սուրեն Մանուկյանը, ՀՑԹԻ համեմատական ցեղասպանագիտության բաժնի վարիչ, պ.գ.թ., «Համատեքստի կարևորությունը պատմության ուսումնասիրության համար.
Հայոց ցեղասպանության նախադրյալները և պատճառները»,
✅ Ռոբերտ Թաթոյանը, ՀՑԹԻ հուշագրությունների, վավերագրերի և մամուլի ուսումնասիրության բաժնի ավագ գիտաշխատող, պ.գ.թ., «Հայոց ցեղասպանությունը թվերի լեզվով»,
✅ Ինեսա Ստեփանյանը, ՀՑԹԻ Կրթական ծրագրերի պատասխանատու, «Վերապրողների հուշերն ու վկայությունները՝ որպես ցեղասպանության թեմայի դասավանդման կարևոր աղբյուր»:
Առաջին օրը մասնակից ուսուցիչները շրջեցին Հայոց ցեղասպանության թանգարանում, որտեղ ՀՑԹԻ ավագ էքսկուրսավար Անժել Թևեքելյանի ուղեկցությամբ ծանոթացան մշտական և ժամանակավոր ցուցադրություններին:
Երկրորդ օր հետևյալ ելույթներով հանդես եկան՝
✅ Նարինե Մարգարյանը, ՀՑԹԻ գիտական քարտուղար, պ.գ.թ., «Երեխաները՝ Հայոց ցեղասպանության թիրախում»,
✅ Գոհար Խանումյանը, ՀՑԹԻ գլխավոր ֆոնդապահ, «Նեմեսիս․ վրիժառություն, թե՞ արդարադատության իրականացում»,
✅ Ռեգինա Գալուստյանը, ՀՑԹԻ համեմատական ցեղասպանագիտության բաժնի գիտաշխատող, «Դասավանդելով ոճրագործների մասին. անհրաժեշտությունը և մարտահրավերները»,
✅ Թեհմինե Մարտոյանը, ՀՑԹԻ Հայոց ցեղասպանության զոհերի փաստագրման և տվյալների հավաքագրման բաժնի ավագ գիտաշխատող, պ.գ.թ., «Քրիստոնյա այլ ժողովուրդների ցեղասպանությունը»,
✅ Նաիրա Երկանյանը, Համբարձում Գալստյանի անվան թիվ 83 ավագ դպրոցի պատմության ուսուցչուհի և «Աշխարհացույց» կրթական ծրագրի դպրոցների կապի պատասխանատու և վերապատրաստող ուսուցիչ, «Հայոց ցեղասպանության թեմայի դասավանդման մեթոդիկայի խնդիրներն ու առանձնահատկությունները»,
✅ Հարություն Մարությանը, ՀՑԹԻ տնօրեն, պ.գ.դ. և Ռեգինա Գալուստյան, ՀՑԹԻ համեմատական ցեղասպանագիտության բաժնի գիտաշխատող, «Հայոց ցեղասպանության հիմնախնդիրներ» դասընթացի ծրագրի շուրջ:
Ամառային դպրոցի վերջին օրը հետևյալ ելույթներով հանդես եկան՝
✅ Նաիրա Սահակյանը, ՀՑԹԻ Արցախի, Նախիջևանի և Ադրբեջանի հայաբնակ շրջաններում հայության բռնաճնշումների ուսումնասիրության բաժնի ավագ գիտաշխատող, պ.գ.թ., «Ցեղասպանության կանխարգելումը. գիտակցվածության և գործողությունների խաղ»,
✅ Գայանե Մովսեսյանը, On Point LLC հիմնադիր տնօրեն, «Վիրտուալ տիրույթի կիրառումը կրթության և մշակույթի տիրույթներում»,
✅ Շուշան Խաչատրյանը, ՀՑԹԻ Հայոց ցեղասպանության զոհերի ու վերապրողների փաստագրման և ուսումնասիրության բաժնի վարիչ, պ.գ.թ., «Հայոց ցեղասպանության ընթացքում կրոնի դերի ներկայացման մեթոդների շուրջ»,
✅ Նարեկ Մանուկյանը, «Պարադիգմա» կրթական հիմնադրամի համահիմնադիր, «Պատմության քննական ուսուցման ռազմավարություն»:
Յուրաքանչյուր բանախոսի ելույթին հաջորդեցին հարցուպատասխան և քննարկում:
Ուսուցիչներին տրվեցին գնահատման հարցաթերթիկներ, որի արդյունքները հաշվի կառնվեն՝ հետագա դասընթացներն առավել արդյունավետ դարձնելու համար:
Դասընթացի ավարտին ՀՑԹԻ տնօրեն Հարություն Մարությանը և կրթական ծրագրերի պատասխանատու Ինեսա Ստեփանյանը հավաստագրեր հանձնեցին ուսուցիչներին: Ինեսա Ստեփանյանը շնորհավորեց նրանց և շնորհակալություն հայտնեց ծրագրին դիմելու և մասնակցելու համար:
Ամառային դպրոցի մասնակիցները երրորդ օրվա ավարտին այցելեցին Հայոց ցեղասպանության հուշահամալիր, ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության մեկուկես միլիոն անմեղ զոհերի հիշատակը:
