23.04.2022
Ս.թ. ապրիլի 20-22-ը տեղի ունեցավ «Հայոց ցեղասպանության թանգարան-ինստիտուտ» հիմնադրամի կազմակերպած «Հայոց ցեղասպանության դասավանդման մարտահրավերները 21-րդ դարում» խորագիրը կրող եռօրյա գիտաժողովը:
Գիտաժողովին բացման խոսքով հանդես եկավ ՀՑԹԻ տնօրեն Հարություն Մարությանը: Ողջույնի խոսքով հանդես եկավ ՀՀ ԿԳՄՍ նախարարի տեղակալ Ժաննա Անդրեասյանը:
Գիտաժողովի առաջին օրը տեղի ունեցավ նաև «Հայոց ցեղասպանության թանգարան-ինստիտուտ» հիմնադրամի կազմակերպած
«Հայկական վարժարանների հետքերով. ուսյալ ազգի վկայագրերը» խորագրով ժամանակավոր ցուցադրության բացումը: Նույն օրը մասնակիցներն այցելեցին Հայոց ցեղասպանության հուշահամալիր, ծաղիկներ դրեցին անմար կրակի մոտ, մեկ րոպե լռությամբ հարգեցին Հայոց ցեղասպանության սուրբ նահատակների հիշատակը:
Գիտաժողովին իրենց մասնակցությունը բերեցին ցեղասպանագիտության և հարակից ոլորտների շուրջ երեսուն մասնագետներ Հայաստանից, ԱՄՆ-ից, Ռուսաստանի Դաշնությունից, Լիբանանից, Իսրայելից, Ռուանդայից, Իսպանիայից, Հարավ-Աֆրիկյան Հանրապետությունից և Կամբոջայից:
Եռօրյա գիտաժողովն ունեցավ 6 նստաշրջան, որոնց ընթացքում քննարկվեցին հետևյալ թեմաները.
● Ցեղասպանության դասավանդում. արժեքային և էթիկական խնդիրներ,
● Ցեղասպանության դասավանդումը միջնակարգ ուսումնական հաստատություններում,
● Ցեղասպանության դասավանդումը բարձրագույն ուսումնական հաստատություններում,
● Թանգարանների դերը և ներդրումը ցեղասպանության կրթության մեջ,
● Հայոց ցեղասպանության դասավանդում անհատական պատմություններով,
● Հայոց ցեղասպանության դասավանդման առանձին շեշտադրումներ:
Ներկայացվեց 29 գիտական զեկույց, որից 9-ը ներկայացրին ՀՑԹԻ գիտաշխատողներ։
Գիտաժողովի երկրորդ օրը մասնակիցներն այցելեցին Էջմիածնի Մայր Տաճարի թանգարան: Գիտաժողովի շրջանակներում տեղի ունեցավ նաև աշխատաժողով, որին մասնակցեցին 2019, 2020, 2021 թթ. ՀՑԹԻ կազմակերպած կրթական ծրագրերի հայոց պատմության ուսուցիչները: Ուսուցիչները շեշտեցին նման հանդիպումների անցկացման կարևորությունը և հույս հայտնեցին, որ Հայոց ցեղասպանության թանգարան-իստիտուտը հետամուտ կլինի և կօժանդակի իրենց բարձրաձայնած հարցերի լուծմանը:
Հարցուպատասխանի և քննարկումների ավարտից հետո տեղի ունեցավ գիտաժողովի փակման արարողությունը:
ՀՑԹԻ տնօրեն Հարություն Մարությանն իր երախտագիտությունը հայտնեց բոլոր նրանց, ովքեր իրենց ներդրումն ունեցան գիտաժողովի կազմակերպման և անցկացման կարևոր գործում։ Ամփոփելով գիտաժողովի արդյունքները՝ բանախոսները շեշտեցին ներկայացված թեմաների արդիականությունը և հույս հայտնեցին, որ առանձին ժողովածուի տեսքով լույս կտեսնեն ներկայացված զեկուցումները:
