Հուլիսի 10-11-ը Փարիզում տեղի ունեցավ ՅՈՒՆԵՍԿՕ-ի կողմից նախաձեռնած «Դիտարկելով հակասեմականությունը կրթության մեջ և միջոցով» (Addressing antisemitism in and through education) համաժողովը:

Համաժողովին մասնակցում էին ներկայացուցիչներ աշխարհի 27 երկրներից: Հայաստանի ներկայացուցիչներից էր նաև «Հայոց ցեղասպանության թանգարան – ինստիտուտ» հիմնադրամի Համեմատական ցեղասպանագիտության բաժնի վարիչ, պ.գ.թ. Սուրեն Մանուկյանը:

Համաժողովի հիմնական նպատակն էր աշխարհի բոլոր երկրների ուշադրությունը կենտրոնացնել հակասեմականության երևույթի վրա և մշակել դրա դեմ պայքարելու քաղաքականություն՝ կրթության միջոցով, գիտակրթական և տեղեկատվական առցանց հարթակների մշակմամբ:

Երկու օրվա ընթացքում մասնակիցները ծանոթացան հակասեմականության ժամանակակից դրսևորումներին, այն գործնական հմտություններին, որոնք կարող են գործուն և օգտակար լինել բռնությունը, ծայրահեղակությունը և, մասնավորապես, հակասեմականությունը կանխելու, դրա դեմ պայքարելու համար:

Մասնակիցները այցելեցին նաև Շոայի հուշարձան-թանգարան: