Հունվարի 24-ին Հայաստանի հրեական համայնքի ներկայացուցիչները համայնքի ղեկավար Ռիմա Վարժապետյանի գլխավորությամբ հավաքվել էին Երևանում Հոլոքոստի և Մեծ Եղեռնի զոհերին նվիրված հուշարձանի մոտ և Հոլոքոստի զոհերի հիշատակին հարգանքի տուրք մատուցել։
Միջոցառմանը ներկա էր նաև «Հայոց ցեղասպանության թանգարան-ինստիտուտ» հիմնադրամի տնօրեն Հարություն Մարությանը, ինչպես նաև գեներալ լեյտենանտ, հայ-հրեական ֆորումի ղեկավար, պրոֆեսոր Հայկ Քոթանջյանը, ՀՀ-ում Ֆրանսիայի արտակարգ և լիազոր դեսպան Ջոնաթան Լակոտը, Հայաստանի Հանրապետությունում բնակվող այլ ազգային փոքրամասնությունների ներկայացուցիչներ և անվանի գործիչներ: Հիշատակի միջոցառմանը բացման խոսքով հանդես եկավ տիկին Վարժապետյանը:
Ելույթ ունեցավ նաև ՀՑԹԻ հիմնադրամի տնօրեն Հարություն Մարությանը, ով մասնավորապես նշեց.
«Այսօր՝ հունվարի 27-ը, Հոլոքոստի զոհերի հիշատակի օրն է:
Ամբողջ աշխարհն է դատապարտում հրեաների ցեղասպանությունը: ՄԱԿ-ի 2005 թ. որոշմամբ Աուշվից-Բիրկենաուի ազատագրման օրը որպես Հոլոքոստի զոհերի հիշատակի միջազգային օր նշելու որոշումը երկու նպատակ է հետապնդում՝ հարգել անմեղ զոհերի հիշատակը և կրթել հանրությանը՝ առաջին հերթին հնարավոր ցեղասպանությունները կանխարգելելու նպատակով»:
ՀՑԹԻ տնօրենը նշեց նաև, որ Հայոց ցեղասպանության թանգարան-ինստիտուտն առաջին անգամ 2020 թ. 24-31 հունվարին անց է կացնում Հոլոքոստի հիշողության շաբաթ՝ նվիրված Աուշվից-Բիրկենաու համակենտրոնացման ճամբարի ազատագրման և Երկրորդ համաշխարհային պատերազմի ավարտի 75-ամյակին:
Ավելի վաղ պարոն Մարությանը նշել էր նաև, որ «Հոլոքոստի հիշողության շաբաթը» սկիզբ կդնի, կձևավորի մի նոր ավանդույթ՝ Հայոց ցեղասպանության թանգարան-ինստիտուտը ողջ տարվա ընթացքում կփորձի անցկացնել տարբեր ազգերի ցեղասպանություններին նվիրված համանման միջոցառումներ.
«Մենք ուզում ենք Հայաստանի տարածքում բնակվող ազգային փոքրամասնությունների, որոնք ցեղասպանության դառը ճակատագիրն են կիսել, նկատի ունեմ ասորիներին, հույներին, եզդիներին, նաև նրա՛նց նվիրված հիշողության օրեր կամ հիշողության շաբաթներ կազմակերպել»։
«Ապրել, չմոռանալ… Հայ և հրեա ժողովուրդների եղեռնի զոհերի հիշատակին». գրված է հուշարձանի վրա:
