Սույն թվականի մայիսի 14-ին Հայոց ցեղասպանության թանգարան-ինստիտուտի տնօրեն Հայկ Դեմոյանը ելույթ ունեցավ Բուխարեստի համալսարանում`ուսանողների, դասախոսական կազմի և օտարերկրյա ունկնդիրների լսարանի առջև:
Հայկ Դեմոյանն անհերքելի փաստարկներով ներկայացրեց օսմանյան և թուրքական իրավահաջորդ երեք վարչակարգերի` աբդուլհամիդյան, երիտթուրքական և քեմալական իշխանությունների ծրագրավորած և իրականացրած Հայոց ցեղասպանությունը, որի հետևանքները մինչև այսօր ծանրացած են հայ ժողովրդի ուսերին: Նա ընդգծեց, որ Հայոց ցեղասպանությունը պատմական անցյալ չէ, այլ ներկա, քանի որ թուրքական իշխանությունները շարունակում են քաղաքական, տնտեսական և դիվանագիտական ճնշումներ իրականացնել Հայաստանի վրա` Ադրբեջանի հետ համատեղ խոչընդոտելով Հայաստանի զարգացմանը, ահաբեկում և հետապնդում են պատմական արդարության մասին բարձրաձայնողներին, միջազգային մակարդակով ծավալում ժխտողական քաղաքականություն, վիրավորում և վարկաբեկում զոհերի հետնորդներին:
ՀՑԹԻ տնօրեն Հայկ Դեմոյանը նշեց, որ ցեղասպանությունը համայն մարդկության հիշողության և զգոնության մաս է կազմում, հատկապես այն երկրներում, որոնք ներգրավված են եղել Առաջին համաշխարհային պատերազմի իրադարձությունների մեջ և որտեղ հետագայում ապաստանել են կոտորածներից վերապրածները: Այս իմաստով նա կարևորեց կատարվածը դատապարտելու և արդարությունը վերականգնելու համընդհանուր ջանքերը, առանց որի այդ վտանգը մշտապես կսպառնա մարդկությանը:
Մոտ երկու ժամ տևած դասախոսության ընթացքում Հայկ Դեմոյանը պատասխանեց նաև լսարանի բազմաթիվ հարցերին:
Նույն օրը Բուխարեստի Հայոց միությունում տեղի էր ունեցել Հայոց ցեղասպանության 100-րդ տարելիցին նվիրված միջոցառումների տեղական հանձնաժողովի նիստը, որի ընթացքում Հայկ Դեմոյանը՝ որպես պետական հանձնաժողովի քարտուղար, դեսպան Համլետ Գասպարյանի, Ռումինիայի Հայոց թեմի առաջնորդ Տաթև եպս. Հակոբյանի, սենատոր, Ռումինիայի Հայոց միության նախագահ Վարուժան Ոսկանյանի ու ռումինահայ մի շարք մտավորականների հետ քննարկեց կազմակերպական հարցեր: Ձեռքբերվեցին պայմանավորվածություններ առաջիկա երեք տարվա ընթացքում համատեղ միջոցառումներ կազմակերպելու վերաբերյալ:
Բուխարեստում Հայկ Դեմոյանը ծանոթացավ նաև Հայոց թանգարանի նյութերին և արխիվներին, որոնք վերաբերում են 20-րդ դարասկզբի իրադարձություններին: Հայկ Դեմոյանի այցը կազմակերպվել էր Ռումինիայում Հայաստանի դեսպանության և Ռումինիայի Հայոց միության համագործակցությամբ Հայոց ցեղասպանության 97-րդ տարելիցի միջոցառումների շրջանակներում:
