25.05.2023
Մայիսի 23-ին Հայոց ցեղասպանության հուշահամալիրի տարածքում ՀՑԹԻ տնօրենության նախաձեռնությամբ և Ռամկավար ազատական կուսակցության կենտրոնական վարչության օժանդակությամբ իրականացվեց ծառատունկ շուրջ 7000 քառ. մետր տարածքի վրա (ժամանակի ընթացքում ծառատունկ կիրականացվի ևս 1.5 հա-ի վրա): Ծառատունկին մասնակցեցին Ռամկավար ազատական կուսակցության անդամներ, ՀՑԹԻ աշխատակիցներ և Երևանի «Վարդանանց ասպետներ» թիվ 106, Գագիկ Ստեփանյանի անվան թիվ 135, Աշոտ Նավասարդյանի անվան թիվ 196, Լև Տոլստոյի անվան թիվ 128 հիմնական և Արտաշես Շահինյանի անվան ֆիզիկամաթեմատիկական հատուկ դպրոցների աշակերտներ և ուսուցիչներ:
Ծառատունկի մեկնարկից առաջ ՌԱԿ անդամները ծաղկեպսակ դրեցին Հայոց ցեղասպանության զոհերի հիշատակը հավերժացնող հուշակոթողին, այնուհետև ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության անմեղ զոհերի հիշատակը:
Ծառատունկից հետո տեղի ունեցավ ՀՑԹԻ թանգարանային ֆոնդերի «Գեղանկարչություն, քանդակ, և կիրառական արվեստ» բաժնի հիմնանորոգված և վերակահավորված ֆոնդապահոցի պաշտոնական բացումը: ՀՑԹԻ տնօրեն Հարություն Մարությանը և ֆոնդապահ Արևիկ Սմբատյանը ՌԱԿ կենտրոնական վարչության անդամներին ներկայացրեցին կատարված աշխատանքը և շնորհակալություն հայտնեցին օժանդակության համար, շեշտելով, որ այսուհետ ՀՑԹԻ ֆոնդերում առկա գեղանկարչության և կիրառական արվեստի նմուշները կպահպանվեն միջազգային նորմերին համապատասխան ֆոնդապահոցում:
Արդեն ՀՑԹԻ գիտաժողովների սրահում ՀՑԹԻ տնօրեն Հարություն Մարությանը ներկայացրեց Հայոց ցեղասպանության հուշահամալիրի 100 հեկտար կանաչապատ տարածքը Հիշողության զբոսայգու վերածելու ընդարձակ նախագիծը և դրա հայեցակարգը: Հիշողության զբոսայգու ճարտարապետական հնարավոր լուծումների տարբերակներին առավել հանգամանորեն անդրադարձավ Ճարտարապետության և շինարարության Հայաստանի ազգային համալսարանի ճարտարապետության ֆակուլտետի դեկան Արմեն Շատվորյանը: ՀՑԹԻ տնօրեն Հարություն Մարությանը հույս հայտնեց, որ համահայկական ջանքերի շնորհիվ ժամանակի ընթացքում Հիշողության զբոսայգին իրականություն կդառնա:
Հանդիպման ավարտին ՀՑԹԻ տնօրեն Հարություն Մարությանը Հայոց ցեղասպանության հուշահամալիրի տարածքում ծառատունկ կազմակերպելու համար «Ավրորա Մարդիգանյան» հուշամեդալով պարգևատրեց ՌԱԿ կենտրոնական վարչության անդամ Յակոբ Պըլըխեանին, իսկ ՀՑԹԻ ֆոնդապահոցի հիմնանորոգելու և վերակահավորելու համար «Ֆրիտյոֆ Նանսեն» հուշամեդալով պարգևատրվեց ազգային բարերար Նազար Նազարյան (այն հանձնվեց պրն Նորայր Մկրտիչեանին): Շնորհակալություն հայտնելով ՀՑԹԻ նախաձեռնություններին աջակցելու համար՝ ՀՑԹԻ տնօրենը շնորհակալագրեր հանձնեց ՌԱԿ կենտրոնական վարչության ատենապետ Մայք Խարապեանին, ՌԱԿ կենտրոնական վարչության փոխատենապետ Ալեքսան Գարատանայեանին և ՌԱԿ կենտրոնական վարչության գանձապահ Նորայր Մկրտիչեանին:
Հանդիպման ավարտին կողմերը հույս հայտնեցին, որ համագործակցությունը երկու կազմակերպությունների միջև շարունակական կլինի:
Իսկ արդեն այսօր ՌԱԿ կենտրոնական վարչության ատենապետ Մայք Խարապեանը ՀՑԹԻ տնօրեն Հարություն Մարությանին պարգևատրեց Ռամկավար ազատական կուսակցության հիմնադրման 100-ամյակի կապակցությամբ թողարկված մեդալով:
