26.01.2018
Այսօր Հայոց ցեղասպանության թանգարան-ինստիտուտի ժամանակավոր ցուցադրությունների սրահում տեղի ունեցավ Լիդիցեի գեղեցիկ արվեստների 45-րդ միջազգային պատանեկան ցուցահանդեսի մրցանակների հանձնման արարողությունը: Միջոցառումը վարում էր ՀՀ-ում Չեխիայի Հանրապետության արտակարգ և լիազոր դեսպան Պետր Միկիսկան, ով և հանձնեց մրցանակները:
Ողջույնի խոսքով հանդես եկավ ՀՑԹԻ տնօրենի պաշտոնակատար Գևորգ Վարդանյանը, ով կարևորեց նման միջոցառումների դերը երեխաների աշխարհայացքի ձևավորման գործում, իսկ աշխարհի բոլոր երեխաներին ցանկացավ այլևս երբեք չտեսնել Լիդիցեի նման ողբերգություն և ապրել խաղաղ երկնքի տակ:
ՀՀ-ում Չեխիայի Հանրապետության արտակարգ և լիազոր դեսպան Պետր Միկիսկան իր երախտագիտությունը հայտնեց Հայոց ցեղասպանության թանգարան-ինստիտուտին միջոցառմանն աջակցելու համար:
2017թ. ցուցահանդես-մրցույթի թեման եղել է Ճամփորդությունը:
Միջոցառման ընթացքում տեղի ունեցավ Երկրորդ համաշխարհային պատերազմի ընթացքում նացիստների կողմից ոչնչացված չեխական Լիդիցե գյուղի ողբերգությանը նվիրված ցուցահանդեսի բացում:
Լիդիցեի գեղեցիկ արվեստների միջազգային պատանեկան ցուցահանդեսը հիմնվել է 1967 թ` ի հիշատակ չեխական Լիդիցե գյուղում գերմանացի նացիստների կողմից սպանված և պատերազմի ընթացքում զոհված երեխաների:
