26.10.2023
Հոկտեմբերի 24-ին Հայոց ցեղասպանության թանգարան-ինստիտուտի գիտաժողովների սրահում տեղի ունեցավ Ֆրանսիայի Պուատիեի համալսարանի ԱՄՆ պատմության և քաղաքակրթության պրոֆեսոր, Ֆրանսիայի համալսարանական ինստիտուտի անդամ Ժյուլիեն Զարիֆյանի «ԱՄՆ-Ը ԵՎ ՀԱՅՈՑ ՑԵՂԱՍՊԱՆՈՒԹՅԱՆ ՃԱՆԱՉՈՒՄԸ» խորագրով դասախոսությունը:
Նախ ներկաներին ողջունեց ՀՑԹԻ տնօրենի ժամանակավոր պաշտոնակատար, պ.գ.թ. Էդիտա Գզոյանը: Նա նախ համառոտ ներկայացրեց Ժյուլիեն Զարիֆյանին, որը Ֆրանսիայի Պուատիեի համալսարանի ԱՄՆ պատմության և քաղաքակրթության պրոֆեսոր է, Ֆրանսիայի համալսարանական ինստիտուտի անդամ (2020-2025 թթ.):
Դասախոսության ընթացքում Ժուլիեն Զարիֆյանը ներկայացրեց ԱՄՆ-ի՝ Հայոց ցեղասպանության ճանաչման քաղաքականությունը պայմանավորող գործոնները և պատճառները: Մասնավորապես, նա նշեց, որ Հայոց ցեղասպանության ճանաչումը ԱՄՆ-ում երկարատև գործընթաց է եղել, որի ընթացքում առանցքային են եղել աշխարհաքաղաքական իրավիճակը, լոբբիստական գործունեությունը և ցեղասպանության պատմության հիշողութունը ամերիկյան իրականության մեջ: Այս գործոնները ազդեցություն են ունեցել սկզբում ԱՄՆ օրենսդիր իշխանության, ապա ԱՄՆ նախագահ Ջո Բայդենի կողմից 2021 թ. ապրիլի 24-ին Հայոց ցեղասպանության ճանաչելու գործում:
Հանդիպումից հետո ներկաները հնարավորություն ունեցան հարցեր տալու բանախոսին:
