26.12.2024


Երեկ՝ դեկտեմբերի 24-ին, Հայոց ցեղասպանության թանգարան-ինստիտուտի գիտաժողովների դահլիճում տեղի ունեցավ ՀՑԹԻ Հայոց ցեղասպանության զոհերի ու վերապրողների փաստագրման և ուսումնասիրության բաժնի ավագ գիտաշխատող, պ.գ.թ. Թեհմինե Մարտոյանի «Ցեղասպանության քաղաքականության շարունակությունը Զմյուռնիայում (1922)» վերնագրով մենագրության շնորհանդեսը, որին ներկա էին Զմյուռնիայի կոտորածների ականատես-վերապրողների շառավիղները:

Նախ ներկաներին ողջունեց Հայոց ցեղասպանության թանգարան-ինստիտուտի տնօրեն Էդիտա Գզոյանը՝ նշելով, որ թանգարան-ինստիտուտի կարևոր առաքելություններից մեկը ցեղասպանության թեմային առնչվող գրքերի հրատարակությունն է, ապա ավելացրեց՝ «Ցեղասպանության քաղաքականության շարունակությունը Զմյուռնիայում» գիրքը ստեղծվել է Երևանի պետական համալսարանի հետ համագործակցության արդյունքում:

Շնորհանդեսին ներկա էր նաև գրքի խմբագիր, պ.գ.դ., պրոֆեսոր Աշոտ Հայրունին: Շնորհավորելով Թեհմինե Մարտոյանին գրքի լույսընծայման առթիվ՝ պրն. Հայրունին նշեց, որ այն, ինչ տեղի ունեցավ Զմյուռնիայում 1922 թվականին, փաստում է, որ քեմալական վարչակարգը շարունակել է հայերի դեմ ցեղասպանության քաղաքականությունը։

Մենագրության հեղինակ Թեհմինե Մարտոյանը շնորհակալություն հայտնեց ներկաներին` ընդգծելով, որ այս մենագրությունը շուրջ 10 տարվա իր հետազոտության արդյունքն է: Ելույթից հետո Թեհմինե Մարտոյանը ներկաների դատին հանձնեց Զմյուռնիայի հայ համայնքի ժառանգների պատմությունները և նրանց հետ անցկացված հարցազրույցները պարունակող ֆիլմը։