Երեկ երեկոյան ժամը 9-ի կողմերը հրդեհի մասին ահազանգից հետո Ծիծեռնակաբերդի տարածք են մեկնել Արտակարգ իրավիճակների նախարարության ավելի քան մեկ տասնյակ մարտական հաշվարկներ։ Հրդեհաշիջման աշխատանքներին մասնակցել են շուրջ 120 հրշեջներ՝ ղեկավարությամբ նախարար Ֆելիքս Ցոլակյանի։ Հրդեհի օջախը Հայոց ցեղասպանության զոհերի հուշարձանից մոտ 150-200 մետր հեռավորության վրա էր, սակայն ուժեղ քամու պատճառով կրակը տարածվում էր արևմուտք, դեպի թանգարանի շենքը։ Մեր հաշվարկներով, այրվել է 1.5 – 2 հա խոտածածկ տարածք։ Ծիծեռնակաբերդում հրդեհներ են լինում գրեթե ամեն տարի։

Հայոց ցեղասպանության թանգարան-ինստիտուտի Ծիծեռնակաբերդ զբոսայգու և հուշահամալիրի սպասարկման աշխատակիցները, չնայած փոքրաթիվ լինելու հանգամանքի, ամեն տարի մեծ ծավալի աշխատանքներ են կատարում։ Այս տարի ևս ճանապարհների ու արահետների մերձակա տարածքներում առկա փարթամ խոտը հնձվել է ու տեղափոխվել։ Սակայն ոռոգման համակարգը հին է, իր ներկա վիճակով ի վիճակի չէ կատարելու իր վրա դրված գործառույթները։

Լուծումներից մեկը Ծիծեռնակաբերդը արդի պահանջներին համապատասխանեցնելն է, որպեսզի զբոսայգին իրոք դառնա կանաչ տարածք, կատարի «քաղաքի թոքերի» գործառույթը։ Ավանդաբար, ամեն տարվա գարնանից մինչև ուշ աշուն, հատկապես երեկոյան ժամերին, զբոսայգում իրենց հանգիստն են անցկացնում հարյուրավոր համաքաղաքացիներ։ Դեռևս անցյալ տարվա գարնանը ՀՑԹԻ-ին հանդես էր եկել Ծիծեռնակաբերդը «Հիշողության զբոսայգու» վերածելու առաջարկով, այս տարվա ձմռանը ՀՀ Նախագահը թարմացրեց տարիներ առաջ իր պատրաստած առաջարկը զբոսայգին «Հայ պարկի» վերածելու մասին։ Ներկայում կառավարական շրջանակներում քննարկումներ են գնում խնդրի կենսագործման ձևերի ու ճանապարհների ուղղությամբ և վստահ ենք, որ կգտնվեն ճիշտ լուծումներ։

Իսկ մինչ այդ, հարգելի հայրենակիցներ, պետք է այնպես անել, որպեսզի բացառվի հրդեհների ծագման հարցում մարդկային գործոնի դերը։ Եղեք ուշադիր, քանի որ զգալի չափով նաև ձեզնից է կախված Ծիծեռնակաբերդի զբոսայգու անվտանգությունը։