2021 թ. հունվարի 13-ին
Հայոց ցեղասպանության թանգարան-ինստիտուտի (ՀՑԹԻ) և
Հայագիտական ուսումնասիրությունների ընկերակցության (SAS) միջև կնքվեց փոխգործակցության համաձայնագիր:
Կնքված համաձայնագիրը նպատակ ունի համագործակցության հիմք ստեղծել գիտական տարբեր ծրագրերի շրջանակներում: Փոխգործակցությունը կներառի գրքերի և գիտական հրատարակությունների փոխանակում, Հայոց ցեղասպանության ուսումնասիրության ոլորտում առկա փորձի և գիտելիքի փոխանակում, Հայոց ցեղասպանության ուսումնասիրության ու հետազոտման վերաբերյալ խորհրդատվության տրամադրում և այլն: Համաձայնագրով փոխգործակցություն է նախատեսվում նաև տեղական և միջազգային գիտաժողովների և աշխատաժողովների կազմակերպման հարցում, որը կնպաստի ցեղասպանագիտության, մասնավորապես Հայոց ցեղասպանության ուսումնասիրության զարգացմանը: Պայմանագրով նախատեսվում է նաև աշխատանքներ իրականացնել Հայոց ցեղասպանության իրազեկության մակարդակը հասարակության լայն շերտերի շրջանում բարձրացնելու ուղղությամբ, ինպես նաև համագործակցել Բրիլ հրատարակչատան կողմից հրատարակվող
Հայագիտական ուսումնասիրությունների ընկերակցության հանդեսի և Հայոց ցեղասպանության թանգարան-ինստիտուտի կողմից լույս տեսնող
Հայոց ցեղասպանության ուսումնասիրության միջազգային հանդեսի ու
Ցեղասպանագիտական հանդես գիտական պարբերականների միջազգայնացման հարցերում:
Մեկնաբանելով համագործակցության նշանակությունը՝ ՀՑԹԻ տնօրեն
Հարություն Մարությանը փաստեց, որ 21-րդ դարում հայագիտության ոլորտի հետազոտողների առաջ կանգնած մարտահրավերները պահանջում են նոր, ժամանակակից մոտեցումներ և հայկական ներուժի սերտ համախմբում։ Հումանիտար գիտությունների ոլորտում հայկական գործոնի ձևավորումը՝ համաշխարհային փորձի հաշվառմամբ, մեր ժամանակների առաջնահերթություններից է։ Հայոց պատմության և մշակույթի, Հայոց ցեղասպանության խնդիրների ուսումնասիրությունը, հանրահռչակումը թե ՀՑԹԻ, թե ՀՈՒԸ-ի հրամայականների մեջ են։ Վստահ ենք, որ համագործակցության պայմանագրում նշված հարցերը միանգամայն իրագործելի են և կնպաստեն երկու կողմերի հետազոտողների միջև կապերի ընդլայնմանը, հայագիտության զարգացմանը։
ՀՈՒԸ նախագահ
Պետրոս Տեր Մաթոսյանը նույնպես կարևորեց ՀՑԹԻ հետ համագործակցության հաստատումը՝ նշելով, որ համագործակցության պայմանագրի կնքումը բխում է ՀՈՒԸ-ի նոր քաղաքականությունից՝ ամրապնդել կապերը հայաստանյան գիտական կառույցների հետ, ինչն էլ թույլ կտա, միավորելով երկու կողմերի գիտական ներուժը, խթանել Հայոց ցեղասպանության ուսումնասիրությունը:
*
Հայագիտական ուսումնասիրությունների ընկերակցությունը հիմնադրվել է 1974 թ. և միավորում է հայագիտությամբ զբաղվող գիտնականներին և ուսուցիչներին: Ընկերակցության նպատակն է խթանել հայկական մշակույթի և հասարակության, ներառյալ՝ պատմության, լեզվի, գրականության և քաղաքական, տնտեսական, սոցիալական հարցերի վերաբերյալ ուսումնասիրությունները:
ՀՈՒԸ մասին կարող եք տեղեկատվություն ստանալ societyforarmenianstudies.com կայքում և @societyforarmenianstudies ֆեսյբուքյան էջում:
