28.03.2023
Մարտի 24-ին Հայոց ցեղասպանության թանգարան-ինստիտուտի և Հարավային Կալիֆոռնիայի համալսարանի Շոա հիմնադրամի (USC Shoah Foundation) միջև կնքված փոխգործակցության շրջանակներում ՀՑԹԻ գիտաժողովների սրահում բանախոսությամբ հանդես եկավ Հարավային Կալիֆոռնիայի համալսարանի Շոա հիմնադրամի Հայոց ցեղասպանության վիդեո- և աուդիովկայությունների ինդեքսավորման մասնագետ Օսիկ Մոզեսը`
«Հայոց ցեղասպանության վկայությունների նշագրման (ինդեքսավորման) գործիքներ» (“Armenian Genocide Testimonies’ Indexing Tools”) թեմայով:
Նախ՝ ներկաներին ողջունեց ՀՑԹԻ Հայոց ցեղասպանության զոհերի ու վերապրողների փաստագրման և ուսումնասիրության բաժնի վարիչ, պ.գ.թ. Շուշան Խաչատրյանը և նշեց, որ բանախոսությունը մեծապես կնպաստի Հայոց ցեղասպանության զոհերի և վերապրողների հաշվառման առավել ընդգրկուն և միաժամանակ մատչելի բազա ստեղծելուն:
Տիկին Օսիկ Մոզեսը բանախոսության ընթացքում կիսվեց վիդեո- և աուդիովկայությունների ինդեքսավորման իր փորձով, ներկայացրեց դրանց դասակարգման ձևերն ու մեթոդները, որոնք հետազոտողներին թույլ կտան շտեմարանից օգտվելիս առավել հեշտ կողմորոշվել: Նա հենց տեղում Հարավային Կալիֆոռնիայի համալսարանի Շոա հիմնադրամի կայքէջի միջոցով քայլ առ քայլ ցույց տվեց, թե ինչպես են իրենք ինդեքսավորում վկայությունները: Դասախոսության ավարտին ներկաները հնարավորություն ունեցան հարցեր ուղղելու բանախոսին:
