29.11.2016


Իրաքի Քուրդիստանի մշակութային մայրաքաղաք Սուլեյմանիեում նոյեմբերի 20-ից 23-ը տեղի ունեցավ Գալավեժի ամենամյա 20-րդ փառատոնը:

«Լուսավորյալ սերնդի ազատ միտքը» խորագիրը կրող փառատոնն այս տարի նվիրված էր հայ-քրդական առնչություններին:

Փառատոնին մասնակցող հայկական պատվիրակության կազմում էր ՀՑԹԻ փոխտնօրեն Սուրեն Մանուկյանը:

Ծրագրի մեկ օրը նվիրված էր Հայոց ցեղասպանության թեմային:

Պատմական գիտությունների թեկնածու Սուրեն Մանուկյանը ներկայացրեց Օսմանյան կայսրությունում հայկական բնակչության կարգավիճակի խնդիրը, ինչպես նաև՝ թուրքական իշխանությունների դիրքորոշման քաղաքականության շարունակականությունն այդ հարցում: Ներկայացվեց նաև պանթուրքական քաղաքականության առաջացումը, որը, միախառնվելով հայերի՝ սեփական ստորադաս կարգավիճակը փոխելու ձգտմանը հակադարձելու երիտթուրքական քաղաքականության հետ, հանգեցրեց ցեղասպանության իրականացման գաղափարին:

Սուրեն Մանուկյանն անդրադարձավ Հայոց Ցեղասպանության իրականացման փուլերին և հետևանքներին: Նա շեշտեց, որ Հայոց Ցեղասպանությունը միայն հայոց պատմության դրվագ չի, այլ՝ մարդկության պատմության մաս: Այդ առումով Հայոց Ցեղասպանության թեմայի բարձրաձայնումը, քննարկումը, դատապարտումը անհրաժեշտ են ապագայում ցեղասպանությունների դեմ պայքարի տեսակետից:

«Գալավեժ» մշակութային փառատոնին մասնակցում էին տեղի քաղաքական և մշակութային հայտնի գործիչներ՝ ԻՔ փոխվարչապետը, Իրաքի մշակույթի նախարարը, ԻՔ բարձրագույն կրթության և գիտության, մշակույթի նախարարները, Քուրդիստանի հայրենասիրական միության գործադիր մարմնի ղեկավարը, ինչպես նաև՝ քուրդ մտավորականության ազդեցիկ ներկայացուցիչներ: