Այսօր ՀՑԹԻ գիտաժողովների սրահում տեղի ունեցավ «Հոլոքոստի հիշողության շաբաթ» միջոցառումների շրջանակում հերթական հանդիպումը:
Ելույթ ունեցավ ԵՊՀ պատմության ֆակուլտետի հայոց պատմության ամբիոնի դասախոս, պատմ. գիտ. դոկտոր, պրոֆեսոր Աշոտ Հայրունին «Հրեաների զանգվածային բնաջնջման նախապատրաստումն ու իրականացումը հիտլերյան վարչակարգի կողմից» թեմայով դասախոսությամբ: Պրոֆեսորը պատմական ընդարձակ էքսկուրսի միջոցով ներկայացրեց Հոլոքոստի պատմության ողջ իրականությունը՝ անհատական պատմություններից մինչև Բյուրեղյա գիշեր և զոհերի թվաքանակի մասին եղած տվյալների ամփոփում:
Հանդիպմանը ներկա էր նաև Հայաստանի հրեական համայնքի ղեկավար Ռիմա Վարժապետյան-Ֆելերը, որ իր երախտագիտությունը հայտնեց ՀՑԹԻ-ին թեմայի հանդեպ ուշադրության ու «Հոլոքոստի հիշողության շաբաթ» կազմակերպելու նախաձեռնության համար:
Ինչպես ավելի վաղ նշել էինք, Հայոց ցեղասպանության թանգարան-ինստիտուտն իր գործունեության ընթացքում առաջին անգամ կազմակերպել է Հոլոքոստի հիշողության շաբաթ՝ նվիրված Աուշվից-Բիրկենաու համակենտրոնացման ճամբարի ազատագրման և Երկրորդ համաշխարհային պատերազմի ավարտի 75-ամյակին:
Նախորդ հանդիպումը տեղի էր ունեցել հունվարի 29-ին: Ի դեպ միջոցառման մասնակիցներին ողջույնի խոսք էր հղել նաև
ՀՀ նախագահ Արմեն Սարգսյանը:
