01.03.2019


Փետրվարի 26-ին «Հայոց ցեղասպանության թանգարան-ինստիուտ» հիմնադրամում տեղի ունեցավ փորձնական կրթական ծրագրի առաջին օրվա մեկնարկը: Մասնակցեց «Ուսում» հանրակրթական դպրոցի VIII Գ դասարանը: Հայոց ցեղասպանության թանգարան այցելած դպրոցականները շրջեցին ցուցասրահներով, իրենց համար հատուկ մշակված ծրագրով ծանոթացան Հայոց ցեղասպանության պատմությանը:

ՀՑԹԻ գիտաժողովների սրահում դպրոցականները մասնակցեցին նաև ինտերակտիվ դասախոսության՝ նոր մշակված մեթոդաբանությամբ, որը վարեց «Հայոց ցեղասպանության թանգարան-ինստիտուտ» հիմնադրամի գիտաշխատող Սեդա Պարսամյանը՝ «Հայկական ինքնապաշտպանական մարտերի խորհուրդը, պատանիների արժեհամակարգի ձևավորման մեջ» թեմայով:

Դասախոսության ընթացքում ցուցադրվեց նաև Մուսա լեռան ինքնապաշտպանությանը նվիրված ֆիմի տեսաձայնագրությունը, որտեղ ներկայացվում է Մուսա լեռան ինքնապաշտպանական մարտերին մասնակցած վերապրողի պատմությունը:

Աշակերտներին հանձնարարվեց առաջադրանք՝ ներկայացնել իրենց տպավորությունները թանգարան կատարած այցից և դասընթացից հետո: Աշակերտների տպավորությունների շարադրանքները կուսումնասիրվեն, կարվեն համապատասխան հետևություններ ու կներառվեն տարաբնույթ կրթական ծրագրերի մեթոդաբանությունը մշակելիս:

Նոր տեղեկություններով և գիտելիքներով հարստացած աշակերտները հեռացան կրկին վերադառնալու ակնկալիքով:

Հաշվի առնելով թեմայի ներկայացման բարդությունը և բազմազանությունը՝ ՀՑԹԻ կրթական ծրագրերի բաժինը և նրա համակարգող Քրիստինե Նաջարյանը մշակել են հատուկ մեթոդաբանությամբ և ստեղծարար մոտեցումներով դասընթաց:

Տեղեկացնենք, որ «Հայոց ցեղասպանության թանգարան-ինստիտուտ» հիմնադրամի կողմից կազմակերպված կրթական ծրագրերը դեռ մշակման փուլում են, որոնց մի մասի մեկնարկը կտրվի ս.թ. ապրիլին:

Օր 2- Բանախոս՝ Շուշան Խաչատրյան, աստվածաբան-կրոնագետ, պ.գ. թ., ՀՑԹԻ համեմատական ցեղասպանագիտության բաժնի գիտաշխատող
Բանախոսության թեման՝ Հարրի Փոթթերը, քրիստոնեության սահմանապահն ու Մեծ եղեռնը, աշակերտները՝ «Ուսում» հանրակրթական դպրոցի VIII ա դասարան:

Oր 3- Բանախոս՝ Էլինա Միրզոյան, բ.գ.թ. «Հայոց ցեղասպանության թանգարան-ինստիտուտ» հիմնադրամի գիտաշխատող
Բանախոսության թեման՝ Հրանտ Դինքը և Հայոց ցեղասպանության թեմատիկան, աշակերտները՝ «Ուսում» հանրակրթական դպրոցի VIII դ դասարան և Ղ. Աղայանի անվան թիվ 63 դպրոց VIII ա դասարան:

Oր 4- Բանախոս՝ Նարինե Մարգարյան, բ.գ.թ. «Հայոց ցեղասպանության թանգարան-ինստիտուտ» հիմնադրամի գիտական քարտուղար
Բանախոսության թեման՝ Հայոց ցեղասպանությունը և հայ երեխաները, աշակերտները՝ «Ուսում» հանրակրթական դպրոցի VIII ա դասարան: