Այսօր «Հայոց ցեղասպանության թանգարան-ինստիտուտ» հիմնադրամի գիտաժողովների սրահում տեղի ունեցավ «Հայրերի մեղքը․ թուրքերի մերժողականությունը և Հայոց ցեղասպանությունը» գրքի հեղինակ, Նյու Յորքի Մանհեթթենվիլի քոլեջի պրոֆեսոր, Շվոն Նաշ Մարշալի հետ հանդիպում-քննարկում:
Ողջույնի խոսքով հանդես եկավ ՀՑԹԻ հիմնադրամի տնօրեն Հարություն Մարությանը:
Հանդիպմանը ներկա էր նաև բեստսելեր ճանաչված «Արտույտների ագարակը» վեպի հեղինակ, Պադովայի համալսարանի պրոֆեսոր Անտոնիա Արսլանը, ով «Հայրերի մեղքը» գրքի նախաբանի հեղինակն է.
«Աշխատության ողջ հյուսվածքում ընթերցողն ականատես է կառուցվող անկասելի այն ծուղակի, որը գլուխ առ գլուխ իրար է կապում այս մահվան ծրագրի մասերը»։
Շվոն Նաշ Մարշալն առաջիններից մեկն է, ով իր գրքում փորձում է ապացուցել, որ երիտթուրքերի կողմից իրականացված հայ և մյուս ժողովուրդների ցեղասպանությունը և Թուրքիայի Հանրապետության կողմից դրա հերքումը տարբեր հանցավոր ակտեր չեն. ժխտողականությունը ցեղասպանության շարունակությունն է: Գիրքը հարուստ է պարբերական մամուլից և նորահայտ արխիվային նյութերից ներառված փաստագրական տվյալներով:
Շվոն Նաշ Մարշալն իր գրքում գրում է.
«Այսօր շատ ենք լսում հետճշմարտության մասին: Լրագրողներն ու մտավորականները որակում են այն որպես մի նոր ցնցող երևույթ, որը ծնունդ է առել վերջերս տեղի ունեցող ընտրարշավներից: Նրանք ժամանակակից քաղաքական հայտարարությունները համարում են սարսափելի հետճշմարտություններ: Ոչինչ այդքան մոլորեցնող չէ: «Պատմական ճարտարագիտությունը» նոր երևույթ չէ: Այն «սոցիալական ճարտարագիտության» երկվորյակն է և սկսել է աճող ավելի մեծ ծավալներով տարածվել ժամանակակից աշխարհի մայրամուտից ի վեր: Այն ժամանակակից փիլիսոփայության նախապայմաններից, մեթոդներից ու ձգտումներից մեկն է:
Այս գիրքն առաջին մասն է Փիլիսոփայության դավաճանությունը» եռավեպի, որը վերաբերում է հետճշմարտություններ երևույթի սկզբնաղբյուրներին: … Ամենահաջողված ժամանակակից օրինակն է պատմական և սոցիալական ճարտարագիտության ծրագիրը՝ Հայոց ցեղասպանությունը: Այն և´ Թուրքիայի «պատմական ճարտարագիտության», այսինքն՝ ցեղասպանության ժխտման նրա պաշտոնական քաղաքականությունն է, և´ ահռելի սոցիալական ու տարածքային ճարտարագիտության կիրառումը, որոնք հանգեցրին առաջին քրիստոնյա ազգի հայերի սպանդին»:
Տեղի ունեցավ ակտիվ հարց ու պատասխան, հնչեցին մեկնաբանություններ, մտքերի փոխանակումներ:
Միջոցառման ավարտին քյամանչայով կոմիտասյան կատարումներ ներկայացրեց Շվոն Նաշ Մարշալ լավ բարեկամ, համախոհ Հակոբ Խալաթյանը:
