14.07.2018


Հուլիսի 11-ին, կյանքի 101-րդ տարում մահացել է 1913-1916 թթ. Օսմանյան կայսրությունում ԱՄՆ դեսպան Հենրի Մորգենթաուի (26 ապրիլի 1856թ. – 26 նոյեմբերի 1946 թ.) թոռը՝ Հենրի Մորգենթաուն 3-րդը (11 հունվարի 1917 թ. – 11 հուլիսի 2018թ. ):

Գրող և հայտնի հեռուստատեսային պրոդյուսեր Հենրի Մորգենթաու կրտսերը մշտապես պայքարել է Հայոց ցեղասպանության միջազգային, մասնավորապես Միացյալ նահանգների կողմից, ճանաչման համար: Հայոց ցեղասպանության պատմության մանրամասները լսել է ականատեսից՝ իր պապիկից, տեսել և որպես օրինակ է ունեցել հենց նրա կյանքի պայքարը հանուն արդարության հաստատման, մարդասիրության:

Հենրի Մորգենթաու կրտսերն իր հարցազրույցներում ու ելույթներում հետևողականորեն խոսել և պատմել է իր պապիկի հիշողություններից ստացած տեղեկությունները: Ելույթներից մեկում նշել է. « Պապս հաճախակի ասում էր, որ Ցեղասպանության ժամանակ հայերի կյանքը փրկելու փորձերը և Մերձավոր Արևելքի օգնության կոմիտեի ստեղծումը նրա ձեռքբերումներից առավելագույնն էին»:

1999 թ. Հենրի Մորգենթաու կրտսերն այցելել է նաև Հայաստան, եղել Հայոց ցեղասպանության հուշահամալիրում, հարգանքի տուրք է մատուցել Մեծ եղեռնի զոհերի հիշատակին: Մասնակցել է նաև իր պապիկի՝ Հենրի Մորգենթաուի գերեզմանից բերված հողի Հուշապատի մեջ ամփոփման միջոցառմանը:

Հիշեցնենք, որ Հայոց ցեղասպանության թանգարան-ինստիտուտը մշտապես իր գործունեության հորիզոնում է պահել Հենրի Մորգենթաուի կյանքի ու գործունեության հիշատակման միջոցառումները, կապ է պահել նրա ազգականների հետ:

2015 թ. ՀՑԹԻ-ում բացվեց նաև նրա անունը կրող աշխատասենյակ: