Հուլիսի 9, 2008 թ.

Աննախադեպ նվիրատվություն` ՀՑԹԻ-ին

Վերջին մեկ տարվա ընթացքում Հայոց ցեղասպանության թանգարան – ինստիտուտի կողմից Հայոց ցեղասպանության թեմային առնչվող հազվագյուտ նմուշների հավաքչական աշխատանքի արդյունքում թանգարանի հավաքածուն համալրվել է եզակի նյութերով:

Օրերս թանգարանին աննախադեպ նվիրատվություն կատարեց ամերիկաբնակ մեր հայրենակցուհին` Անահիտ Ասիլյանը: Շուրջ 150 օրինակ ձեռագործ բացառիկ նմուշներն ի պահ տրվեցին ՀՑԹԻ-ին: Այնթափի, Ադանայի և Մարաշի ձեռագործ աշխատանքների յուրօրինակ այս հավաքածուն ներկայացնում է 18, 19, և 20-րդ դարերի հայկական ձեռագործ արվեստը:

Արմատներով Այնթափից Անահիտ Ասիլյանը հայտնի է հայկական բացառիկ ձեռագործ նմուշների իր հավաքածուով և ձեռագործ արվեստի պատմության հարուստ գիտելիքներով: Նա հանդիսանում է «Քեզ համար Հայաստան» ընկերության հիմնադիրը և կազմակերպել է բազմաթիվ շրջիկ ցուցադրություններ աշխարհի տարբեր երկրներում:

Թանգարան – ինստիտուտի տնօրինության որոշմամբ, թանգարանի արժեքների հարստացման նպատակով իրականացված նվիրատվության համար Անահիտ Ասիլյանը պարգևատրվելու է ոսկե մեդալով և շնորհակալագրով: Պարգևատրման պաշտոնական արարողությունը տեղի կունենա հուլիսի 10-ին, ժամը 12:00 ՀՑԹԻ-ում: