Սեպտեմբերի 05, 2008թ.

Յոհաննես Լեփսիուսի ծննդյան 150-ամյակին նվիրված միջազգային գիտաժողով

Հայոց ցեղասպանության թանգարան-ինստիտուտը 2008 թ. սեպտեմբերի 8-ին կազմակերպում է միջազգային գիտաժողով` նվիրված գերմանացի միսիոներ Յոհաննես Լեփսիուսի ծննդյան 150-ամյակին:
Յոհաննես Լեփսիուսը հայ ազգի հավատարիմ բարեկամն ու պաշտպանն էր: 1894 – 1896 թթ. հայերի առաջին զանգվածային կոտորածներից հետո Լեփսիուսը գործադրել է իր բոլոր ջանքերը և հնարավորությունները ցեղասպանությունը վերապրողներին օգնելու համար: Նրա անմիջական նախաձեռնությամբ հիմնվում են որբանոցներ, հիվանդանոցներ, դպրոցներ ու գործարաններ:
1912-1914 թթ. Լեփսիուսը մասնակցում է հայկական բարեփոխումների ծրագրի մշակմանը: 1919 թ. նա լույս է ընծայում «Գերմանիան և Հայաստանը 1914-1918 թթ.» Հայկական հարցին և Հայոց ցեղասպանությանը վերաբերող գերմանական փաստաթղթերի ժողովածուն:
Գիտաժողովին զեկույցներով հանդես կգան Բաբկեն Հարությունյանը (ԵՊՀ), Աշոտ Հայրունին (ԵՊՀ), Արտեմ Օհանջանյանը (անկախ փորձագետ, Վիեննա), Ռուբինա Փիրումյանը (Կալիֆորնիայի համալսարան, ԱՄՆ), Անդրեաս Բաումանը (Քրիստոնեական օգնության կոմիտե Արևելքում, Գերմանիա), Տիլման Ալերտը (Մայնի Ֆրանկֆուրտի համալսարան, Գերմանիա), Մանֆրեդ Աշկեն (Գերմանիա):

_______________________________
Օրը` Սեպտեմբերի 8
Ժամը` 10.00
Վայրը` ՀՀ ԳԱԱ Նախագահության նիստերի դահլիճ
Էլ. փոստ` info@genocide-museum.am