06.04.2021


XX-XXI դարերում Արցախում, Նախիջևանում և Ադրբեջանի հայաբնակ վայրերում հայերի դեմ իրականացված զանգվածային բռնություններն ու ցեղասպանական գործողություններն ուսումնասիրելու նպատակով իրականացվող նախաձեռնությունների շրջանակում ս. թ. փետրվարի 26-ին Հայոց ցեղասպանության թանգարան-ինստիտուտը հայտարարել էր երեք գիտաշխատողի թափուր հաստիքի մրցույթ:

Մարտի 24-ին կայացած մրցույթի արդյունքում ընտրվեցին երեք գիտաշխատողներ՝ Նաիրա Սահակյանը, Գայանե Հովհաննիսյանը և Հայաստան Մարտիրոսյանը:

Նաիրա Սահակյանն իր դոկտորական թեզը պաշտպանել է Ամստերդամի համալսարանում, հեղինակ է երկու մենագրությունների` “Muslim Reformism in Daghestan: Islamic Politics and Muslim Education after the Russian Revolution” և «Փլուզված կայսրություններ, խորհրդայնացված երազանքներ. հայ մտավորականության ընկալումները 1917 թ. հեղափոխության և Հայաստանի ապագայի տեսլականի վերաբերյալ» (լույս է տեսնելու 2021 թ.):

Գայանե Հովհաննիսյանն ավարտել է ԵՊՀ պատմության ֆակուլտետը։ Ուսումը շարունակում է նույն ֆակուլտետի Հայոց պատմություն ամբիոնի ասպիրանտուրայում՝ «Լեռնային Ղարաբաղի ինքնավար մարզի ժողովրդագրական պատկերը 1923-1989 թթ.» թեմայով։

Հայաստան Մարտիրոսյանն ավարտել է ԵՊՀ միջազգային հարաբերությունների ֆակուլտետը, ապա ուսումը շարունակել ԵՊՀ Հայագիտական հետազոտությունների ինստիտուտի «Ցեղասպանագիտություն» մագիստրոսական ծրագրում:

Շնորհավորում ենք մեր երեք գիտաշխատողներին և մաղթում նրանց բեղուն գործունեություն՝ Արցախի հարցը միջազգային գիտական լայն շրջանակներին ներկայացնելու ճանապարհին: