24.08.2016


ՀՑԹԻ գիտաշխատողներ Գոհար Խանումյանը և Ռեգինա Գալուստյանը օգոստոսին Կանադայում մասնակցել են Ցեղասպանության և մարդու իրավունքների կրթական ծրագրին:
Դասընթացի շրջանակներում ուսումնասիրվել են մարդու իրավունքներին և դրանց կոպիտ խախտումներին վերաբերող ունիվերսալ հարցեր: Ինչու և ինչ պատճառներով են տեղի ունենում ցեղասպանությունները, ինչպես է առաջանում ժխտողականությունը, ինչ հետևանքներ են թողնում ցեղասպանությունները կանանց և երեխաների վրա, ինչ դեր ունեն միջազգային իրավունքն ու միջազգային կազմակերպությունները, ինչպիսի սոցիալական, տնտեսական և հոգեբանական ներազդեցություն կա ոճրագործների, վերապրածների և նրանց ժառանգների վրա, ինչպես կարելի է կանխել ցեղասպանությունները` այս հարցերի քննարկմանը մասնակցել են փորձառու գիտնականններ և սկսնակ հետազոտողներ:

Մասնակիցները ծրագրի ընթացքում ներկայացրել են թեմատիկ զեկույցներ: Գոհար Խանումյանը ներկայացրել է «Մեկ հայ-մեկ ոսկի. փրկության գործողություններ Հայոց ցեղասպանության տարիներին» խորագրով զեկուցումը: Ռեգինա Գալուստյանը հանդես է եկել «Փոքր Ասիայի հոմոգենիզացիայի գաղափարը` որպես թուրքական ինքնության ձևավորման հիմնական բաղադրիչ» զեկույցով:

Այս տարի Ցեղասպանության և մարդու իրավունքների վերաբերյալ կրթական ծրագրի ամենամյա 15-րդ դասընթացին մասնակցել է շուրջ երկու տասնյակ ուսումնասիրող աշխարհի տարբեր երկրներից: Հայաստանը ներկայացրել են հինգ մասնակից:

Ամենամյա ծրագիրը երկշաբաթյա ակադեմիական կուրս է, որտեղ բարձրակարգ դասախոսներն ու տարբեր երկրներից ժամանած մասնակիցները ներկայացնում և քննարկում են մարդու իրավունքների, ցեղասպանության տեսությունների, Հայոց ցեղասպանության, Հրեական Հոլոքոստի, Կամբոջայի, Ռուանդայի, Դարֆուրի ցեղասպանությունների, ժխտողականության, ցեղասպանության հոգեբանական ազդեցությունների, ցեղասպանության և միջազգային իրավունքի, ցեղասպանության կանխարգելմանն առնչվող թեմաներ ու հիմնահարցեր:

Դասընթացն անցկացվում է Տորոնտոյի համալսարանում:

Ծրագրի հիմնական նպատակներից է ցեղասպանագիտական համեմատական ուսումնասիրությունների միջոցով պատկերացնել ցեղասպանություններին և զանգվածային բռնության մյուս ձևերին նախորդող պայմաններն ու նախադրյալները, ինչը մեծապես կօգնի նախապես բացահայտել բռնության մոտալուտ նշանները և գտնել դրանց կանխարգելման ուղիները:

Զորյան ինստիտուտը և Ցեղասպանության եւ մարդու իրավունքների ուսումնասիրությունների միջազգային ինստիտուտը առաջին շահույթ չհետապնդող միջազգային կենտրոններն են` նվիրված ցեղասպանություններին, Մարդու իրավունքներին եւ Սփյուռք-Հայրենիք հարաբերություններին վերաբերող հետազոտություններին և արդի հարցադրումների փաստագրմանը:


Ծրագրի մասին ավելի մանրամասն կարդացեք այստեղ`

http://www.genocidestudies.org/GHRUP/index.html